Death threat makagisi

Obligasiyon sa kapolisan ang pagdakop sa mga nakalapas sa balaod.

Apan dili na tawhanon kon ilang bun-ogon ang dinakpan sama sa usa ka ginapos nga mananap, kinsa bisag pulipulihan pa nila pagbukbok, wala intawoy palad ikasagang.

Busa, igo na lang sa pag-agunto sa matag kumo, patid ug puan sa armas nga motugpa sa kalawasan.

Usa ka Eddie Basillote, kanhi giingong drug pusher, gisikop sa kapolisan pinaagi sa gipahigayong illegal drug buy-bust operation didto sa Nasipit, Talamban niadtong Abril 18.

Pero matod pa sa pamilyang Basillote, wala kunoy buy-bust operation nga nahitabo.

Kay ang insidente didto man mahitabo sa gaming shop sa Ponce 11, Barangay Caretta, diin samtang nagdula si Basillote, midaguok-sulong ang mga armadong lalaki (gituohang mga polis kay may silingang nakaila sa usa kanila).

Pag-umangkon ni Basillote ang nagbantay sa gaming shop niadtong tungora.

Gani, gihapak pa kuno siya ug iyang baby sa mga nangaging anino samtang nagpaingon ngadtong Basillote.

Tanang gihimo sa maong grupo labi na ang unsay ilang gibuhat ngadtong Basillote uban sa mga kaubanan ug kadugo, nahipos sa panan-aw sa nagbantay’ng CCTV.

Sobra ka brutal ang ilang gipahungaw nga kasuko.

Nahimong viral ang maong CCTV footage nga gikuninitan sa mga komentariyo sa social media. Sagad sa nakakita sa video, didto mosimpatiya sa dinakpan samtang ang kinabag-an naglagot sa kapolisan.

Kay imbes ang mga mananakop magpaila sa ilang kaligdong, nagpasundayag na hinuon sa ilang kahiwian.

Paglabay sa mga adlaw, ang asawa ni Basillote misumbong sa mga reporter, nga dihang mibisita siya ni Basillote, gisultian siya, nga ilang tibuok pamilya ipahurot kunog patay ni CCPO Director Royina Garma kon dili tangtangon ang naasoyng video.

Pastilan, misamot kagisi ang integridad sa kapolisan nga gision na daan.

Hinuon, gihimakak kini ni Garma. “Diyos ko, ang liit niya. Hindi ko itaya ang career para sa kanya. Na-anticipate ko na gagawin nila ito.” 

Tipik sa pamahayag ni Garma aron takpan ang gialegar nga nabuhian niyang death threat ngadto sa pamilyang Basillote.

Sa tuno sa pamahayag ni Garma, milutaw nga nagisi iyang pagka-opisyal sa maong napagawas nga alegasyon gikan sa asawa ni Basillote, kinsa nagisi sab ang kasingkasing sa tumang kahadlok.

Kay kinsa bay makatulog sa maong bahad?