Saka ug kanaog sa lana
Laing umento sa presyo sa gasolina ang mosugat sa mga motorista karong adlawa.
Gamay ra hinuon ang usbaw, P0.10 matag litro, ug way kausaban ang mga presyo sa krudo ug kerosene. Apan mahimo nga magpadayon ang pagsaka sa presyo sa lana, nga nisulbong na og kapin sa 30% sa unang tulo ug tunga ka buwan karong tuiga, sa mosunod nga mga semana. Matulisok ning mosunod:
• Gubat sa Libya nga mahimong makahulga sa ilang produksiyon sa lana; ug
• Nagpadayon nga pagbabag sa Estados Unidos sa oil exports sa Iran ug Venezuela.
* * *
Makapasamot sila sa pagtidlom sa kalibotanong suplay sa lana kay nagpadayon pa ang agresibo nga laslas sa produksiyon (hangtod sa 1.2 milyones ka baril sa lana matag adlaw) sa Organization of Petroleum Exporting Countries (OPEC) nga gipangulohan sa Saudi Arabia ug non-OPEC countries nga gipangulohan sa Russia. Laing hinungdan sa gikabalak-an nga dugang pagsulbong sa presyo sa lana: Ang pagtidlom sa suplay sa lana gikan sa Estados Unidos nga, kay wa may labot sa konsabo sa Saudi ug Russia, mao ra untay makapabaha sa suplay sa lana sa merkado sa kalibotan.
* * *
Giisip nga labing seryusong hulga sa suplay ang pagpaduol sa Libyan National Army (LNA) ni Heneral Khalifa Haftar sa Tripoli, ulohan sa Libya, nga gusto niyang sakmiton gikan sa gobyerno ni Primero Ministro Fayez Mustafa al-Sarraj. Gikahadlokan nga ang ilang gubat makaputol sa produksiyon sa lana sa Libya.
Determinado sang Saudi ug ubang sakop sa OPEC pagpaburot sa presyo sa lana ngadto sa $80 matag baril (gikan sa $70 karon) aron pagbalanse sa ilang budget.
* * *
Di hinuon mahimong laktawan ang politikanhong interes ni US President Donald Trump.
Nga niisip nga ang pagpabiling barato sa lana maoy yawe sa pagdaog og ikaduhang termino sa piniliay sunod tuig. Siya ray makasingka sa Saudi ug makapaluag sa ekonomikanhong silot batok sa Iran.
Gawas ni Trump, mosukwahi sab sa tinguha sa Saudi ug OPEC paghimong mas mahal sa lana ang posibleng pagbakwi sa suporta sa Russia ug ang hulga sa pagkaluya sa kalibotanong ekonomiya nga mosangpot sa pagtidlom sa demanda nga mao ang mas seryuso ug mas malungtaron nga hulga sa ilang ginansiya.
* * *
- Latest
