Natingala ko ining bayhana kay lagi nagdamgo siya og bampira. Gibati niya ang tumang kahadlok kay basin og may dautang espiritu nga kaniya naghasol.
Nahasol siya basin og paakon kuno siya. Mao nga ako siyang giingnan kun gwapo ba ang bampira. Gwapo kuno matud pa niya.
Naluoy ko niya mao nga ako siyang giingnan nga ang bampira dili nato sabton ingon nga siya dautang espiritu nga nihasol kaniya. Apan mahimo siyang sabton ingon nga responsibilidad ug buhat nga nakahatag kaniya og tumang pressure nga maoy hinungdan kun nganong nahurot ang enerhiya sa iyang pagkatawo.
Pressures kini sa katilingban, sa iyang gitrabahoan ug sa mga tawo nga migawas nga maayo sa una apan makadaut diay sa kaulahian. Mga tawo nga nihurot sa iyang kusog ug mga pangandoy. Mga tawo nga nigamit lamang sa iyang katakus aron siya mapahimuslan.
Ako siyang giingnan nga kun dili siya mohinayhinay sa iyang binuhatan diha sa pagkayud sa hilabihan, mamahimong mahurot alang kaniya ang tanan. Maluya siya ug mawad-an siya og umoy.
Maglisud siya og panaw padulong sa integrasyon. Mamahimo siyang mahutdan og kusog nga mahimong moresulta sa iyang kamatayon pinaagi sa suicide. Nibakho siya ug nidanguyngoy. Ako siyang giingnan nga ayaw kabalaka may panahon pa aron magbag-o ka. Angayan lamang nga higugmaon niya ang iyang kaugalingon, atimanon niya kini ug palipangon sa paagi nga balanse ug anaa sa hustong ritmo.
Maayo ang pagpaspas ug nindot ang dagan kun himuon nato kini sa paagi nga relaxing ug dili pressure kay sa gikaingon ko na, mamahimong mahutdan kita sa rason ug kahulogan kun nganong buhaton nato ang usa ka butang o ang usa ka paningkamot unya bugtian lamang sa kadaut sa atong panlawas.Dili hinakog ang pag-atiman sa kaugalingon.
Human kapahiri ang iyang mga luha ako siyang gihatagan og tsa nga init kaayo. Iya na unta kining higopon apan ako siyang gipugngan.
Natingala siya dungan ang pangutana: “Ngano man?” Ako siyang giingnan:
“Ang Tsa maoy kahimanan aron makat-onan mo ang bili sa pagpaabot ug sa panahon! wala ka man kaha magdali mao nga atong i enjoy kining maong higayon!” Nipahiyom siya ug dinhi nakita ko ang iyang talagsaong kaanyag!