Umento human sa Semana Santa
Mahimong sugaton og laing umento sa presyo sa mga produkto sa lana ang mga konsumidor inigbalik nila gikan sa Semana Santa. Gikabalak-an nga mopatuman na sab ang mga kompaniya sa lana sa Pilipinas og laing usbaw sa presyo sa krudo, gasolina ug kerosene unya sa Martes, Abril 23.
Kini kon magpadayon ang pagsaka sa presyo sa lana sa merkado sa kalibotan, nga nakabawi na og hangtod sa 30% karong tuiga human sa pagtidlom sa presyo sa Nobyembre ug Disyembre sa niaging tuig. Tanang timaan nipapas sa bisan unsang alibyo sa mga konsumidor.
* * *
Ang kalit nga pagtidlom sa produksiyon sa lana sa tulo ka nasud mao ang labing dagkong hinungdan sa pagsulbong sa presyo sa lana sa niaging mga adlaw:
Ang gubat sa Libya tali sa Libyan National Army nga gipangulohan ni Khalifa Haftar ug sa gobyerno ni Primero Ministro Fayez al-Serraj nakapatidlom sa ilang produksiyon sa lana;
Ang ekonomikanhong silot sa Estados Unidos nipahagba sa exports sa lana sa Iran sa kinaubsan nga ang-ang; ug
Ang nagpadayong politikanhong krisis sa Venezuela nipasamot sa pag-ubos sa ilang produksiyon sa lana.
* * *
May nagpahipi hinuon nga hulga sa maniubra sa Organization of Petroleum Exporting Countries (OPEC) nga gipangulohan sa Saudi Arabia sa pagseguro sa mas taas nga lahutay sa pagsaka sa presyo sa lana karong tuiga: Ang Russia, nga maoy nangu sa non-OPEC countries nga niapil sa artipisyal nga paglaslas sa produksiyon sa lana, mahimong di na moapil sa konsabo sugod sa Hulyo.
Ang hinungdan mao ang nagpadayon nga pagsulbong sa produksiyon sa lana sa Estados Unidos. Nga gikatakdang mosamot pagpahiyos sa nagkagamayng bahin sa Russia sa kalibotanong merkado.
* * *
Naapsan na sa Estados Unidos ang Saudi ug Russia isip kinadak-an nga tinubdan sa krudo sa kalibotan. Karong tuiga gipaabot nga mas mosulbong pa ang iyang produksiyon tungod sa paspas nga paglambo sa Amerikanhong teknolohiya sa shale oil. Ug kay wa man moapil ang Estados Unidos sa konsabo sa OPEC ug non-OPEC countries sa laslas sa produksiyon, niburot ang iyang bahin sa kalibotanong merkado. Mas nipaspas ang pagdaghan sa iyang lana human gilibkas ni kanhi Presidente Barack Obama ang ban sa oil exports sa Estados Unidos niadtong 2016.
* * *
- Latest
