Puasa sa gadgets

Kini ang usa sa mga resolutions nga nahukman sa akong higala sa dihang niingon siya nga iya unang purgahon ang iyang kaugalingon gikan sa mga gadgets. Kini aron maka-focus siya sa mga bulohaton ug pag-ampo ning panahon sa kwaresma.

Kuyog niini ang pagpuasa sa Facebook ug uban pang kahimanan sa komunikasyon. Ako siyang gipangutana kun makahimo ba siya nga kun buot hunahunaon iya man ganing itupad ang iyang mga cellphones ug bation ang tumang kabalisan kun ugaling walay signal.

Determinado kunohay siya apan sa dihang nikiring ang iyang cellphone iya dayon kining gitubag uban ang tam-is nga pahiyom. Nga sa ato pa malisud diay gihapon alang kaniya ang pagsibat sa matentalong agni sa gadgets nga kaniya nakapa-bagets.

Alang nako dili naman tingali kinahanglanon nga atong did-an ang atong kaugalingon gikan sa mga kahimanan sa komunikasyon. Kay kini naman gyud ang atong naandan karon.

Apan ang mahinungdanon nga dili lang gyud ta maka-develop og addiction niini to the point nga masakripisyo nato ang atong relasyon sa atong isig ka ingon, labina gyud diha sa atong pamilya.

Daghan tuod ang nagdungan og kaon apan way tingganay ang show gumikan kay busy kaayo sa pagkupay sa gadget. Usahay madagma na lang kay sige og selfie o dili ba kaha dili makadungog kay sige og paminaw og music.

Sa laktod daghan sa mga tawo ang nahimong walay focus sa ilang kinabuhi ug kun mohimo og desisyon maglibog sanglit daghan naman kaayo ang choices.

Human sa pila ka mga gutlo ako misulod sa akong kwarto uban ang dakong pangutana kun ako pud kaha mahimong mabuhi bisan wala nakoy cellphone. Hinuon dili kini angay ikabalaka kay lisud kaayo ang signal sa akong nahimutangan ug ang mga awit sa mga siloy inubanan sa singgit sa mga gangis mao ang naghatag kanako og pahuway sa matugnaw nga gabii.

Pasalamat gihapon ko kay diha sa kahilom mahimong akong hagpaton ang mga hugot nga mahimo nakong i-post sa social media sa pamasin nga makahatag og positivity ngadto sa uban nga tingali gumikan sa mga stressful bashers ang makahunahuna og hikog kay ang mga ka-chat mas horror pa kay kang MOMO.

Gamita ang gadgets apan higugmaa ang imong kaugalingon dili kay pagpagamit sa gadgets aron sila imong higugmaon.