Bunga sa pangabubho

Nadakpan sa mga sakop sa National Bureau of Investigation ang 17-anyos nga giingong akusado sa pagpatay sa laing minor de edad nga si Christine Lee Silawan.

Ang akusado nailhan sa mga sakop sa NBI-7 tungod sa footage sa CCTV nga gimontar sa dapit diin didto miagi ang akusado ug biktima.

Ang NBI-7 miingon nga miangkon ang akusado atol sa ilang pag-imbestigar kaniya inabagan sa iyang abogado ug representante sa Department of Social Welfare and Development (DSWD). Pangabubho ang rason nganong nahimo sa akosado ang brutal nga pagpatay sa biktima.

Ang akusado anaa na karon sa kustodiya sa DSWD ug didto ilhon kun nakasabot ba siya sa iyang gihimo. Kun ugaling wala makasabot ang akusado sa iyang gihimo nga krimen (act without discernment) ipaubos lamang siya sa diversion program. Pero kun nakasabot ang akosado sa iyang gihimo nga krimin (act with discernment) ipadayon ang paghusay sa kasong murder nga gipasaka batok kaniya.

Dili ko makatuo nga mahimo sa usa ka minor de edad ang pagbaliwala sa kasagrado sa lawas sa iyang biktima. Sayonan mo niana nga iyang gilaplapan ang nawong, giabis ang dunggan, gilangkat ang dila ug giputlan pa sa ubol-ubol ang iyang biktima human niya kini dunggaba sa 30 ka higayon.

Apan ang NBI-7 miingon nga mahimo gayod kini kay nahitabo naman. Res Ipsa Loquitor (The thing speaks for itself). Pero ang kabanay ug mga higala sa minor de edad dili motuo nga mahimo kini sa akusado tungod kay hilumon kini ug ilang nakita sa mga oras nahitabo ang krimin nga nagduwa og basketball. Dili usab kuno pareha ang may-ong sa minor de edad ug sa kuha sa CCTV nga dili pod maklaro ang nawong. 

Kun ang minor de edad man gayod ang naghimo sa krimen ug iya kining nahimo tungod sa pangabubho diin man niya makuha kining maong matang o paagi sa pagbaliwala sa kasagrado sa lawas sa tawo nga gipatay? Iya ba kining nakuha basi sa mga nakita niya sa iyang palibot o bunga lamang kini sa tumang pangabubho? Ambot lang!