Marso 10, 2019: Unang Domingo sa kwaresma
MGA PAGBASA: Dt. 26; 4-10/Sal. 91/Rom. 10;8-13/Lk. 4;1-13
Ang tentasyon naa gyud na sa kanunay. Matag adlaw kita suwayan dili tungod kay deserving kita sa maong pagsulay kondili tungod kay matag karon ug unya mahimong makwestyon ang atong pagkamatinud-anon sa bisan unsang commitment nga atong pagasudlan.
Hinuon sa kinabuhi ug panahon karon daghan kaayo kita og kapilian. Si Hesus human siya kabunyagi ang nihimo una og seklusyon. Sulod sa kap-atan ka mga adlaw iya unang gitago ang iyang kaugalingon agi’g pagpangandam sa iyang umaabot nga kalihukan. Wala siya mokaon.
Sulod sa maong mga panahon siya subsob nga namalandong ug sa maong pamalandong nakita niya ang iyang kaugalingon nga gitintal ug gisuwayan sa karaang kaaway nga mao ang yawa. Gisuwayan kun asa kutob ang iyang pag-agwanta sa iyang kagutom.
Apan nakaagwanta siya niini bisan pa man kun makahimo siya sa bato ngadto sa pan. Ang gitas-on sa templo wala magtukmod kaniya aron makabaton og pasidungog gikan sa mga sumasaksi kun ugaling moambak siya nga dili maunsa.
Ug labaw sa tanan wala siya masilaw sa bahandi bisan pa man kun makuha ni niya gikan sa tumang kasayon. Tinuod daghan kanato ang buot magpakabuotan apan lagi sa atong kahuyangan kita mahitumpawak sa lingla nga hilabihan.
Butang nga sa tumang kaseguro atong pagabasulan. Ning panahon sa kwaresma kita gihagit nga mohimo og pagbalik lantaw sa mga higayon diin kita nasaag gumikan sa pagkadakin-as ug human kita makamatngon niini kita mobarog diin kita nalukapa kay samtang buhi pa kita anaa gihapon ang pagsulay ingon man ang pagpakasala.