“Drug ring” sa Sugbo

Makapahingawa ang kasayuran nga mitumaw human sa pagkasikop sa duha ka gitumbok nga dakong supplier sa drugas dinhi sa Sugbo niadtong miaging Domingo. Kini human masayri nga ang utok sa ilang operasyon usa ka piniriso sa New Bilibid Prison nga si Rustico Ygot.

Matud sa kapolisan nga si Ygot maoy nagpadagan sa operasyon pinaagi sa iyang hinigugma nga si Jocelyn Encila inabagan ni Elymar Ancajas. Si Encila ug Ancajas nasikop sa kapolisan niadtong Domingo sa kadlawon atol sa buwag nga mga operasyon didto sa Consolacion ug Barangay Inayawan dinhi sa dakbayan sa Sugbo.

Gihulagway sa kapolisan nga ang operasyon batok ni Encila ug Ancajas maoy labing dako nilang kalampusan sa kampanya batok sa drugas. Ang laing makapakugang nga kasayuran mao nga ang maong grupo protektado diay og tulo ka pulis ug usa ka sakop sa Coast Guard.

Ang kadagkuan sa kapolisan dinhi sa Central Visayas misubmitir na sa drug matrix didto sa kaulohan.  Ang konswelo hinuon sa publiko, way dagko og ranggo sa kapolisan nga nalakip sa mga protektor. Sumala sa report nga ang tulo ka mga polis protector duna lay ranggo nga staff sergeant o sarhento, corporal ug patrolman.

Atong pasalamatan ang kapolisan sa malampuson nga operasyon. Nakita sa publiko ang ilang dedikasyon ug paningkamot aron masulbad ang problema. Gani minilyon na ang kantidad sa drugas nga ilang masakmit sa pagkakaron sukwahi sa nanlabay’ng administrasyon nga swerte na og dunay linibo nga kantidad nga masakmit.

Sa kadaghan sa drugas nga nasakmit sa kapolisan karon, makapangutana ka kun unsa gyud diay kaha ka dako ang problema kaniadto. Tiaw mo og niabot sa merkado ang P194 milyones nga kantidad sa shabu nga nasakmit niadtong Domingo?

Apan luyo niining way pu-as nga kampanya, di sab kalikayan ang pangutana diin gikan kining drugas nga miabot sa Sugbo? Tinuod kaha nga way laboratory dinhi? Laing pangutana nganong  lisud mabadlong sa gobyerno ang padayong negosyo sa drugas diha sa prisohan?

Duna kahay kalambigitan ang pagdagsang sa mga insik dinhi sa nasud?  Kun nakabantay mo gatusan ka mga insik nga gitugotan sa Department of Labor and Employment nga motrabaho dinhi sa nasud apan kadudahan ang ilang mga trabaho.

Pananglitan, basi sa mga gipublikar sa DOLE daghan kaayo nga mga insik ang misulod sa nasud isip mga interpreter.

Maayo tingali nga panid-an ni sa kapolisan.