Responsableng pagdisiplina

Nagtubo ko nga binunalan sa akong mga ginikanan.  Sa matag sayop nga akong mahimo bugti niini ang mga labod sa akong lawas.

Ang tanang matang sa bunal ako tingaling naagian—sanga sa bayabas, binugha, palwa sa lubi, silhig, pudlos sa kabayo, ug daghan pa.

Wala pay labot niini ang lusi sa dunggan, sa kilid, ug bisan sa bugan.

Luyo sa tanang pagdagmal, matud sa akong amahan nga ako ug ang laing duha nako ka mga igsuon iyang pinangga.

Alang sa usa ka bata lisud sabton nga ang pagdagmal sa ginikanan ngadto sa ilang mga anak paagi sa ilang pagpangga.

Apan dili ikalimod nga tungod sa maong matang sa disiplina nasilsil sa akong hunahuna nga ang pagbuhat og sayop dunay bugti nga silot.

Sa panahon karon nga naghitak ang bisyo ug krimen, importante ang disiplina sa mga bata.

Ug ang pagbunal usa sa mga paagi sa disiplina nga angayang dili ihikaw sa mga ginikanan.

Way tukma nga formula unsaon pagpadako ang mga bata.

Apan importante nga magtubo sila nga dunay kahadlok pagbuhat og sayop. Ug kini mahimo lang kun sila masayod nga sa matag sayop dunay silot nga nagpaabot.

Ang usa ka gamay’ng bata dili makakat-on paglikay sa siga sa lamparilya hangtud nga siya       mapaso.

Busa husto si Presidente Rodrigo Duterte nga gi-veto ang “Anti-Palo” bill ni Senador Risa Hontiveros.

Way dautan sa pagprotihir sa mga bata, apan di sab maayo nga manobra ta sa atong pagprotihir nila tungod kay posibleng magtudlo ni kanila nga mahimong iresponsable.

Ang importante alang sa mga ginikanan nga responsable sab sa ilang pagdisiplina.