Walay ilhon ang sunog

Unang adlaw karon sa Marso diin gisaulog ang nagkadaiyang kalihokan nga gitumong sa mga managlahing adbokasiya.

Usa niini ang Fire Prevention Month nga dili gyud nako sipyaton sa pag-apil niining akong lindog isip pahimangno natong tanan.

Bitaw basta buwan ra ba sa Marso sungogon ra ba gyud sa kahigayonan diin mahitabo ang sunodsunod nga sunog.

Siguro tungod kay mao man kini ang panahon sa ting-init busa gamay’ng sipyat lang mosilaub gyud dayon.

Apan sa buwan sa Pebrero daghan nga dakong sunog ang nahitabo ilabi na sa Dakbayan sa Sugbo.

Busa dili angayan nga mokompyansa kay walay gipili nga panahon ang kadanghag nga mosangpot sa trahedya.

Ma aduna may fire prevention month o wala gikinahanglan gyud nga magmatngon kitang tanan.

Himuon nato nga fire prevention year o fire prevention day aron mapugngan gyud ang pag-ulbo sa sunog.

Daghan ra bang maamong kay bisan og nag-amping ka apan ang imong silingan nagdanghag aw dili gyud moingon ang kalayo nga dili lang ta ka apilon kay dili ikaw ang nakaingon sa sunog.

Magpahinumdumay kitang tanan, dili lang gikan sa mga hingtungdang ahensya sama sa Bureau of Fire, Local Government Unit ug uban pa ang awareness campaign kay pwede usab nato kining buhaton sa atong dapit tungod kay ang komunidad man ang direktang maapektohan.

Murag guba nga plaka apan akong balikon ang mga batakang kasayoran sa paglikay sa sunog.

Likayan ang paggamit og mga butang nga daling makahaling sa sunog, dili mang over charge sa cellphone, ibton ang mga appliances kun dili gamiton, bantayan ang mga bata nga magduwa og kandila, posporo ug uban pang mga delikadong butang.

Dili ang mga bombero ang makaluwas kanato kondili kita ra mismo busa magmatngon kitang tanan.