Karong Pebrero 26 ning tuiga sa kataposan gitakda na gyud ang oral argument diha sa Korte Suprema sa petisyon nga giduso sa Ang Nars party-list upat na ka tuig ang nakalabay.
Nangreklamo ang mga nurses sa public hospitals tungod kay wala ipatuman sa Department of Budget and Management ang provision sa Republic Act 9173 o Philippine Nursing Act in 2002 nga kinahanglang di moubos sa P31,545 (Salary Grade 15) ang sweldo matag buwan sa mga nurses.
Apan wala kini tumana sa DBM tungod sa Executive Order No.811 ni kanhi presidente Gloria Macapagal Arroyo nga nag-ingon Salary Grade 11 ra gyud ang entry level sa public nurses nga nagpasabot P22,055 matag buwan.
Kun ang public nurses gani nangreklamo , unsa nalang kaha ang mga nurses sa mga pribadong tambalanan nga pwerteng gagmaya og sweldo ug overworked pa gyud tungod sa kataas sa oras nga sila patrabahoon.
Dunay mga balita nga nanggawas nga nagkagamay na gyud ang mga nurses sa mga nagkadaiyang tambalanan dili lang dinhi sa Sugbo kondili sa tibuok nasud gumikan sa kagamay sa sweldo.
Matud pa nga dunay mga tambalanan nga tungod sa kagamay sa sweldo nga ilang gihatag namahawa nalang ang ilang mga nurses.
Ang uban giswerte nga nadawat abroad samtang ang uban namalhin sa mga call center companies kay dili tiaw nga mas dako ang ilang sweldo didto.
Sumala pa sa lindog ni Leo Lastimosa nga Arangkada sa miaging semana, kini maoy giingong hinungdan nganong adunay mga pribadong tambalanan ang mobalibad na og pasyente tungod kay kuwang ang nurses nga makaatiman.
Kani nga sitwasyon makapahiubos og maayo sa imahe sa mga nurses ug mao usab ang rason kun nganong adunay uban kanila masipyat na hinuon sa trabaho ug makasala sa ilang mga pasyenteng giatiman.
Dili lang unta ang mga nurses sa pangpublikong tambalanan ang angay tabangan kondili ilakip sab ang mga naa sa pribadong tambalanan.