Yukbo kang Senyor Sto. Niño

Iyukbo nako kang Señor Santo Nino kining akong lindog karong adlawa.

Siya maoy akong manluluwas diha nga ang akong kinabuhi nag-umbaw na unta sa pangpang sa kamatayon.

Lab-as pa sa akong panumdoman nga kaniadtong Hunyo 25, 1995, naligsan ko og prime mover truck nga nagguyod og taas kaayong trailer didto sa Sitio Bakhaw, Barangay Catmondaan, Catmon.

Paingon ko dinhi sa siyudad ug nagtaligsik atol sa maong higayon.

Gidasmagan ko sa higanteng sakyanan nga akong gikasugat ug naligsan sa pangunahang ligid niini.

Sa wala pa moligis kanako ang truck, nakasinggit ko ug nangayo’g tabang ni Santo Niño.

Tuod, nilatay sa duha nako ka paa ang left front wheel sa prime mover.

Daghan ang nagtuo nga mamatay ko ug makupog ang akong kabukogan, apan wala gyud tawon.

Kun lugak pa ang akong pagtuo ug pagsalig kang Santo Niño, tingali wala ako niya milagrohi ug luwasa gikan sa kamatayon niadtong higayona.

Kaniadtong 1981, dunay mihatag kanako og imahen  ni Santo Niño ug gikan niadto, ako na nga nabatasan nga kada lakaw nako sa buntag, mohawok gyud ko sa imahen ug mananghid kaniya.

Inig-abot nako sa balay inig ka gabii, mohawok na sab ko sa imahen ug moingon kaniya nga niabot na ko. Paglabay sa 14 ka tuig, naaksidente ko ug iya ko nga giluwas. Pit Senyor!

Nalipay ko kay kaniadtong 2014, dunay akong amigo nga nihatag kanako og gamay’ng gold plated nga imahen ni Santo Niño.

Kada adlaw, sa akong paglakaw, dad-on gyud nako ang gamay’ng imahen nga maoy nagsilbi nga akong manluluwas.

* * *

Nakurat gyud ko pagkasayod nga si kanhi Cebu City assistant prosecutor Mary Ann Castro gipusil ug gipatay sa wala hiilhing mga tawo kaniadtong Huwebes sa gabii samtang luwan sa iyang sakyanan.

Nakapangutana gyud ko kun ngano nga may nakadala man og armas nga gun ban man kaha?  Tungod niini, dunay nagduda nga ang mga tawo nga gitugotan sa pagdaladala og armas bisan og gunban, posibleng may kalambigitan sa pagpatay ni Castro.

Para nako, dili na lang gyud unta mag gun ban ug tugotan na lang ang mga licensed firearm holders nga makadala og armas bisan og election period.

Kun sila mangabuso gamit ang ilang armas, aw dakpon ug kanselahon ang ilang lisensya.

Dili ba maayo?