Sto. Niño church, gihimong sinehan

Kada naay dagkong okasyon nga iselebrar sama sa Valentine’s Day (hapit na ra ba), sagad sa buhaton sa manag-uyab, mangaon sa mahalong restawran (kon kaya sa bolsa). Dayon, manulod sa bugnawng sinehan aron magpainit sa kalawasan.

Unya’g modilaab na ang kainit sa pagbati, mopatighulog gilayon sa motel ug sulod sa gikahinamang lawak, motulo ang laway sa aircondition samtang nagtan-aw kanila nga naglumbaanay’g pabuto sa makainggit nilang hangos ug inagulo aron lamang madimdim ang inagos sa kinalamiang dugos nga mao ray makahatag og abundang katagbaw sa ilang kauhaw.

Sa miaging Enero 15, Martes, nanimba ming misis sa buntagong 5:30 misa-nobena ni Sr. Sto. Niño (Ika-unom ka adlaw), diin si Rev. Fr. Cris Mostajo, CSSR, maoy presider ug homilist.

Usa siya sa mga nagustohan kong pari diha sa pagpadayag unsa ang matuod nga kahulogan sa ebanghilyo panahon sa Liturhiya ug ang pagkonektar niini ngadto sa kasingkasing sa katawhan uban ang espirituhanong pangindahay nga unta maoy puy-an natong tanan dinha sa inadlaw tang pagpakabuhi ning kalibotan.

Mao nga dihang nalantawan ko didto sa altar sa Basilica Minore del Santo Niño Pilgrim Center nga siyay homilist, nausa akong pokus: Paminawon gyud nako’g maayo iyang wali.

Labi na, kay didto mi makalingkod ni misis sulod sa Basilica church, diin 90% seats gipaatubang sa Pilgrim Center, ay…puwerteng suwerteha!

Apan naunsa ba, nga dinha may duha ka anino, ulitawo’g dalaga, kinsa naglingkod sa among atubangan nga nagsige’g parayganay. Ang babaye maoy unaunahon kaayo.

Iyang tuyoon nga pasandigon ang lalaki ngadto niya aron mapislat iyang dughan. O, kondili, siya ang mosandig sa lalaki ug daw bata nga mopauraray sa bus-ok dughan niini.

Unya, matag karon ug unya, maghinunghongay. Haskang gubaa sa akong deep concentration to hear the homily of Fr. Cris.

Nahibalo kaha ang manag-uyab nga simbahan ang ilang gisudlan?

Ug dili sinehan? Ang makapakurat, kay sa akto na sa pagpangalawat, sila pay unang namarog aron mokaon sa lawas ni Kristo.

Hangyo lang, ngadto sa mga manag-uyab nga manimba sa misa-nobena ni Sr. Sto. Niño. Intawon, ayaw himoang sinehan ang sagrado Niyang pinuy-anan. Kaluy-I, ang mga nanimba nga kinasingkasing nag-ampo.

Ayaw salipdi ang ilang panan-aw sa kangitngit sa inyong pagpabadlong.