EDITORYAL - Sa ngalan sa Bandila

Sa makausa pa gipakita sa mga Pilipino nga makamao kining magkahiusa sa luyo sa Bandila sa Pilipinas. Gipamatud-an kini pag-usab kagahapon atol sa Miss Universe 2018 Pageant nga gihimo didto sa Bangkok, Thailand.

Ang pambato sa Pilipinas nga si Catriona Gray mibuntog sa 93 ka mga kaparehas niyang mga maanyag nga kadalagahan gikan sa nagkadaiyang mga nasud sa kalibotan. Dili man sab hinuon sa tanang panahon pirmeng makadaog ang mga Pilipino sa mga kompetisyon sa gawas sa nasud apan dako kaayong premyo kanato ang matag kadaogan nga madala pauli sa Pilipinas.

Gipakita ni Gray dili lang ang iyang kaanyag ug kamaayong kinaiya sa usa ka Pilipina kondili hasta ang kautokan niini pinaagi sa pagtubag sa mga pangutana nga may punto ug kapunitan og leksyon sa uban.

Ang mga kandidata sa nasud sa Venezuela ug South Africa wala man tuod magpalupig apan sa kataposang hugna sa mga pangutana nakita nga mas undanon ang mga tubag sa pambato sa Pilipinas.

Makita usab nga bisan og toa sa laing nasud kini gihimo, adunay ubay-ubay nga mga Pilipinong nagdala og mga Bandila sa Pilipinas ang nakatambong aron pagpakita sa ilang suporta kang Gray.

Dinhi sa Pilipinas, minilyon ka mga Pilipino ang nakatutok sa ilang mga telebisyon ug bisan sa mga malls, mga tindahan, botika, ug uban pang establisamento.

Dili tungod kay gusto lang sila motan-aw kondili tungod kay sa kinailadman sa ilang hunahuna ug kasing-kasing, suporta kadto kang Gray ug sa Bandila sa Pilipinas.

Maayo unta og dili lang sa ingon niini nga mga sitwasyon pirmeng mogawas ang maong kinaiya sa mga Pilipino kondili sa tanan untang panahon kay tataw kaayo nga basta sa kaayohan gani sa Pilipinas dali kitang magkahiusa.

Matud pa nga basta politika gani magkawatak-watak ang mga Pilipino apan kun pagpaluyo sa Bandila sa Pilipinas mogawas gyud ang kamatuoran nga usa ra gyud kita og hunahuna.

Related video: