EDITORYAL - May kaayohan sa Martial Law?

Kun dunay kalinaw, dunay kalamboan. Mao kini ang pangangkon kasagaran sa mga opisyales sa gobiyerno. Tinuod kini nga panultihon apan dili sa tanang  panahon haom kini sa tanang sitwasyon.

Didto sa Mindanao nga gihamok og kasamok ug terorismo sud na sa pipila ka dekada. Ning bag-o, gisakop sa mga teroristang ISIS-inspired Maute ug Abu Sayyaf ang Marawi City sud sa upat ka buwan.

Kapin usa ka libo ka tawo ang nakalas ug binilyon ka pesos nga ekonomiya sa maong siyudad ang napulpog sa mga bala ug bomba.

Nahuman na ang gubat apan wala pa gihapon gilibkas ang Martial Law ug gani gihangyo pa ang Kongreso nga tugotan ang extension nga gipangayo ni Pres.Duterte base sa rekomendasyon sa militar ug sa kapolisan.

Sa budget hearing kagahapon sa Ubos Balaybalauranan, gigisa sa mga kongresista ang mga opisyales sa militar ug kapolisan ug gipangutana kun unsa ang mga economic gains nga naani sa mga taga Mindanao human nga gipaubos kini sa Martial Law.

Wala makatubag niini ang kasundalohan. Kung ang pangutana tingali kabahin public safety and security gain makatubag gyud sila.

Dili papel sa militar ang paglista ug paghimo og pagtuon kabahin sa gidaghanon sa mga namubo og puhonan sa Mindanao sukad nga gideklarar ang martial law didto. Tinuod nga adunay mga wala ganahi sa martial law tungod sa bati nga kasinatian sa panahon sa rehimeng Marcos. Apan sa nahitabo sa Marawi City husto kadto nga desisyon.

Kanang economic gains maayong adto ipangutana sa National Economic Development Authority ug di sa Armed Forces of the Philippines.

Sayop sab sa habig sa AFP kun mangahas sila pagtubag niini nga pangutana kay di man silay eksperto niini.

Apan ang kuyaw niini, kun moingon nga dako gyud og kalamboan sa ekonomiya sa Mindanao tungod sa martial law. Kay nagpasabot diay nga kun magdeklarar og nationwide martial law molambo sab diay ang ekonomiya sa tibuok nasud?