HIV/Aids sa Oktobre

Mokabat sa 1,072 ka mga bag-ong kaso sa HIV/AIDS ang natala sa Departamento sa Panglawas lukop nasud sa buwan lamang sa Oktobre ug apil niini ang walo ka mga mabdos. Mas taas kini kun itandi sa samang buwan sa miaging tuig.

Sigun sa talaan sa Departamento sa Panglawas ang National Capital Region (NCR) mao ang adunay pinakadaghan og kaso nga mikabat og 343 o 32 porsiyento, gisundan kini sa rehiyon 3 nga adunay 121, rehiyon 7 nga may 82 ug rehiyon 6 nga adunay 76.

Lima sa walo ka mga mabdos nga may HIV/AIDS ang gikan sa NCR samtang ang tulo gikan rehiyon 3, 4A ug rehiyon 7.

Ang pagpakighilawas gihapon ang nag-unang hinungdan sa pagsulbong sa gidaghanon sa sakit nga adunay 1,044 ka mga kaso o 97 porsiyento.

Ning maong gidaghanon 902 o 86 porsiyento nila ang nakighilawas sa parihas nilang lalaki samtang ang laing 15 ka mga kaso gikan sa pagpuli-puli og gamit og dagum sa ilang paggamit og ginadiling drugas. Duha usab ka mga kaso ang natala nga gikan sa inahan ngadto sa anak nga pagbalhin sa kagaw.

Ang talaan sa DOH nagpakita og 9,606 ka mga kaso sa HIV/AIDS sulod lamang sa napulo ka buwan ning tuiga ug kinatibok-ang gidaghanon nga 60, 207 ka mga kaso sukad niadtong buwan sa Enero tuig 1984.

Kining maong gidaghanon dili makonsiderar nga mao na gayod tungod kay gibasi lamang kini sa mga tawo nga miboluntaryo sa ilang kaugalingon sa pagpahiling sa DOH Epidemiology Bureau.

Ako nagtoo nga mas daghan pa ani nila ang nagtago sa ilang kaugalingon tungod sa kahadlok ug kauwaw kun sila mahibaw-an.

Mao ni ang rason nganong gibalik-balik sa kadagkoan sa Departamento sa panglawas ang ilang panawagan sa publiko sa pagpaubos sa HIV test aron kadtong mahibaw-an nga nagpositibo mapaubos sa antiretroviral treatment aron mapaminus ang epidemia.

Ang sulbad ning maong sakit nga wala pay kaayohan ikaw ra gayod higala.