Pahulay ang husto, dili pagsulay
JAV BANATI - Javier Yntig Tapulado (Banat) - December 4, 2018 - 12:00am

Dihang nagpatudlo ang 12 ka tinun-an ni Hesukristo unsaon pagpangadye, naghimo Siyag pangadyeon nga matod pa Niya, naa na tanan dinhi – ang Amahan Namo. Niya pa:

“Kun kamo mag-ampo, ingon ania, Amahan namo, anaa ka sa Langit, pagdaygon Imong ngalan, umabot kanamo Imong gingharian, matuman Imong pagbuot dinhi sa yuta maingon sa Langit.”

Unang linya sa The Lord’s Prayer nga nagpasabot: Nga higugmaon ang Ginoo labaw sa tanan sa tibuok natong kasingkasing, hunahuna ug kalag dinhi sa yuta ug unta sundon sa tawo ang Iyang mga sugo  gikan sa Langit aron maoy mohari sa atong galamhan ang kalipayng walay kataposan nga mao ang Iyang  gingharian nga gibiyaan sa nakasala tang unang ginikanan.

“Ang kalan-on namo, ihatag mo karong adlawa ug pasayloa kami sa among mga sala, maingon nga nagpasaylo kami sa nagpakasala kanamo.”

Kining ikaduhang linya, nagtumbok nga Siya ang tag-iya sa tanan tang panginahanglan. Busa nangaliya-ampo nga hatagan ta Niya sa mga tukmang pagkaon nga makahimsog dili lang para sa lawas, kondili lakip na sa atong kalag nga sama nilang Eba ug Adan, ang kadali ra gyong matental kon tentalon . Busa, matag higayon nga kita makasala, mangayo gyod tag pasaylo sa Ginoo. Ug usab pasayloon ang nakasala nato sanglit miingon man Siya, nga kadtong dili mopasaylo sa nakasala nila, dili pod Niya pasayloon.

“Ug dili mo kami itugyan sa panulay. (panulay ang eksaktong gamiton...ug dili pagsulay) Hinunoa, luwasa kami sa daotan. Amen”

Ning kataposang mga linya, nangilaba ta sa Ginoo nga dili itugyan sa mga kamot sa yawa o demonyo kay sila mao ang panulay nga kusog kaayong manental.

Gani, bisag Iyang anak nga si Hesus, kadaghan man sab tentala sa yawa o panulay. Nga sa ato pa ang buot ipasabot sa maong linya, ‘panulay’ ug dili ‘pagsulay’.

Kay kun moingon tang, ‘dili mo kami itugyan sa pagsulay (life trials)’, sama ra nga mikontra ta sa kabubut-on sa Ginoo, sanglit ang pagsulay nahimo nang kabahin sa krus o misyon nga Iyang gisangon nato, diin kitang tanan moagi gyod ini.

Ang Redemptorists Church, ‘panulay’ ang gigamit nga alang nako mao ang husto ug haom. Hinaot unta, nga mosunod ang tanang simbahan.

HESUKRISTO
Philstar
  • Latest
Latest