Dili ikalimod nga nigamot na ang China sa West Philippine Sea. Sa mosugot pa kita o dili, bisan kinsa pay presidente sa Pilipinas wala na gyuy mahimo aron babagan ang ilang gipanghimo karon diha sa maong lugar.
Ang West Philippine Sea o mas naila nga South China Sea maoy giisip nga “hot spot” ug gikahadlokang mamahimong lugar diin magsugod ang ikatulong kalibotanong gubat.
Dili kini imposibleng dili mahitabo tungod kay diha sa maong lugar ibiyahe ang kapin 5 Trilyones dolyares nga pamatigayon. Tungod kay agianan kini sa mga dagkong barko nga nagdala og komersyo.
Kini maoy hinungdan kon nganong ang Amerika, European Union, Japan, Australia ug uban pa wala gyud moila sa pag-angkon sa China pinaagi sa ilang hinimo-himong 9-dash line nga ilaha ang SCS kon WPS.
Apan kon dawaton sa kalibotan ang pag-angkon sa China sa tibuok WPS, mapugos sila pagtuman sa mga patakaran niini sa maong lugar.
Karon palang, hinayhinay nang nag-inistrikto sa WPS ang China ug nagtukod og mga isla aron masemento ilang ilegal nga pagpangilog sa mga teritoryo sa mga gagmayng silingang nasud sama sa Pilipinas, Brunei, Vietnam, Malaysia ug Taiwan.
Kining tanan paglapas na sa United Nations Conventions on the Law of the Sea(UNCLOS) diin ang China usa sa mga signatories. Gikairita kini sa ubang mga nasud maong kanunay na silang naghimo og ‘military drills’ sa lugar aron ipakita sa China nga wala sila malisang.
Sayon ra para ni Duterte ipamulong nga dili kini gustong mapagan ang Pilipinas kon magkagiyera ang mga dagkong nasud.
Apan sa mata sa mga gamhanang nasud wala silay labot sa sentimiyento ni Duterte tungod kay aduna man silay kaugalingong national interest diha sa SCS.
Kinahanglang mag-amping si Duterte kon asa dapig ug klaruhon gyud og maayo sa timbangan ang posisyon sa Pilipinas bahin sa maong isyu samtang naningkamot siyang makabenepisyo ang nasud gikan sa duha ka habig.