Mitibi ang mga ngabil sa industriya sa musika pagkahibalo nga ang kuwerdas sa kinabuhi ni OPM Legend Singer Rico J. Puno nabugto sulod sa lawak-tambalanan sa St. Luke Medical Center Global City, Taguig niadtong miaging Martes, Oktobre 30 sa ika-ala 1:06 sa kaadlawon.
Ubay-ubay na diayng higayon nga nagbalikbalik si Rico sa ospital. Sa tuig 2015, gi-open heart surgery siya. Pagka Disyembre sa 2017, gi-angioplasty ug ning tuiga, giukban na sab iyang kasingkasing kay gitaorag pacemaker. Kini nagmatuod lang, nga bisa’g nagmalamposon ang mga mananambal pagsalbar sa pasyente pinaagi sa heart surgery, wala kini magpasabot nga ang maong sakit dili na mobalik. Gani, cardiac arrest man ang namatyan ni Rico. Ako diayng suod higalang enhinyero, human operahi sa kasingkasing, hingpit naayo. Pero two years after, giatake-patay gihapon.
Sagad sa mga senior citizens nga katalirongan ni Rico, gibati gyud og tumang kaguol ning iyang pagtaliwan sa dayon. Ug kinsa bay makalimot sa mga limbatianon niyang mga awit sama sa Kapalaran, Buhat, May Bukas Pa, Kapantay Ay Langit, Damdamin, The Way We Were ug daghan pa, nga kanhi gihimong kadulog sa mga kababayen-an diha sa ilang pagkatulog?
Gani, may mga mag-uyab man nga mihimo sa Kapantay Ay Langit ni Rico nga ilang team song sanglit kada bisita sa lalake didto sa boarding house sa babaye, ipatokar gyud kini sa FM station, diin moulokiot sa mga dalunggan sa maghigugmaay ang makahuloganong liriko niini nga giawit sa pinalaghaw-tibuok tingog ni Rico samtang mipauraray si Inday sa naglagubong dughan ni Dodong.
Resulta, daghang nangabuntis sa kantang Rico nga Damdamin, The Way We Were ug Buhat. Kay dihang gipabuhagay sa radyo sulod sa usa ka pribadong lawak ang kahawot sa mga nota niini, hinayhinay pung gianod sa kalimot ang hunahuna sa manag-uyab, nangabungkas ang kandado sa kahugot ug ilang gisulod ang naabling yungib sa pagpakasala.
May mga maghigugmaay nga nagkabulag pero nagkauli tungod sa mga kanta ni Rico. Unya, nagkadayon gyud! Dihang nanganak, ilang ginganlag Rico, agig tam-is nga handumanan sa ilang love story.
Kamatuoran, nga bisag si Rico J. patay na, ang iyang mga kanta magpabiling buhi sa kasingkasing sa mga fans nga iyang gitandog ug gihiusag balik.