CEBU, Philippines – Daghan ang natingala sa kalit nga pagsira sa karsada sa Tabunok, Dakbayan sa Talisay paingon sa habagatan hinungdan sa pagsamot sa trapiko.
Si Rogelio Villaver, hepe sa City of Talisay-Traffic Operation Development Authority (CT-TODA), niklaro nga hasta siya nakurat sa maong hitabo.
Una nilang sabot sa kontraktor nga nagtrabaho sa drainage nga dili sirhan ang lugar panahon sa kabuntagon apan kalit lang nga wala paagii ang lugar niadtong Lunes sa buntag.
Matud ni Villaver nga nipasabot ang Adlawan Construction nga ilang nabuslot ang tubo sa Metropolitan Cebu Water District hinungdan sa pagsugwak sa tubig nga maoy nakaingon nga dili na maagian sa mga sakyanan.
Nagkanayon si Villaver nga swerte lang kay semestral break karon sa pipila ka tunghaan hinungdan nga minus pa ang mga sakyanan nga mag-agian.
Gikatakda nga humanon karong Sabado ang pag-ayo sa nabuslot nga tubo sa tubig aron ang pagsira sa karsada sugod na sa alas 8 sa gabii hangtud sa alas 5 sa kaadlawon. (/GMR)(BANAT NEWS)