EDITORYAL - Sad-an ang netizens

Nabutang karon sa peligro ang kinabuhi sa milyones ka mga masuso gumikan sa nagkalain-laing mga sakit nga hayan motakboy kanila samtang sila nagtubo tungod sa dengvaxia scare.

Ang mga ginikanan nangahadlok pabakunahan ang ilang mga anak diha sa Department of Health tungod sa kontrobersiyal nga anti-dengue vaccine nga Dengvaxia.

Tinuod adunay mga pasangil nga may mga batang nabakunahan niini ang nangamatay, apan wa pay resulta ang pagtuon kon mao ba gyud kini ang hinungdan.

Bisan pa niini, daghan ang nisakay sa mga estorya-estorya ug gisumsoman sa mga iresponsableng netizens sa social media.

Bisan klaro kaayong may bulok pamolitika ang posts bahin sa dengvaxia issue misakay gyud ang mga netizens kay may kalagot sila ngadto sa administrasyong Aquino nga maoy nipasiugda sa programa.

Ang nakadaot bisan pa og fake news o ‘opinyon’ lang sa mga nagpatuong mga eksperto daghan ang nituo kay uso man ang ‘change is coming fever.’

Nabutang karon sa peligro ang mga masuso ug mga bata dili lang  gikan sa dengue, kondili hasta sa ubang mga sakit nga kaniadto kontrolado na sa bakuna.

Dinhi lang sa Central Visayas, gipahibalo sa DOH nga nidoble ang gidaghanon sa mga nasakit og tipdas. Gidudahan nga wala pabakunahi sa mga ginikanan ang ilang mga anak gumikan sa dengvaxia scare.

Angay masayod ang mga ginikanan nga kon dili bakunahan ang ilang mga anak mahimo silang mabuta, mabakol o posibleng mamatay matud pa sa DOH.

Kaning mga sakit nga sagad motakboy sa mga masuso mao kining tipdas, polio, chicken pox, diphtheria ug uban pa.

Kaning mga sakita nakapatay ug nakabalda na og milyones ka masuso sukad naporma ang sibilisasyon sa tawo. Napugngan lang kini dihang nadiskubrehan ang bakuna dili palang dugay.

Kon kinsa man kadtong nagpasiugda niining dengvaxia scare ug kadtong nagpasa-pasa niini sa social media nakatampo gyud sila pagbutang sa peligro sa kinabuhi sa mga masuso karon.