Pinugsanay nga laslas sa presyo
Kon matuman ang pahibawo ni Agriculture Secretary Manny Piñol, motidlom na ang presyo sa bugas humay sa mga tindahan ug kamerkadohan sa Sugbo ug tibuok Pilipinas sugod sa Martes sa sunod semana.
Masaligon si Piñol nga mahitabo ni sa usa lang ka pamilok. Nga ang presyo sa bugas humay nga nagsige og sulbong sa nangaging mga buwan mokalit lang og tidlom tungod sa iyang giluwatan nga suggested retail price (SRP).
Wa matinuod ang pasalig sa economic managers nga tungod sa importasyon sa National Food Authority (NFA) mobarato ang bugas humay.
Ang bag-ong pasalig ni Pi?ñol gipasikad sa iyang pakigtagbo sa labing dagkong mga negosyante sa bugas humay.
* * *
Laing sugo ni Pinol: Sugod karong Oktubre 23, lima na lang ka matang sa bugas humay ang mabaligya ug nga, gawas sa mahalon nga special o fancy rice, ang upat kinahanglang motuman sa SRP:
• Lokal nga regular-milled rice: P39 matag kilo;
• Lokal nga well-milled rice: P44 matag kilo;
• Imported nga regular-milled rice: P37 matag kilo; ug
• Imported nga well-milled rice: P40 matag kilo.
* * *
Sa labing uwahing pakisusi sa Cebu City Market Authority sa presyo sa bugas humay sa 11 ka merkado nga ubos sa iyang pagduma, napamatud-an nga nius-os na ang presyo sa bugas humay:
Human nisulbong ngadto sa P54 matag kilo sa niaging buwan, nitidlom na ngadto sa P49 matag kilo.
Palihug tabang og paniid kon hingpit na bang mawagtang ang mga sinakong gimarkahan og Sinandomeng, Super Angelica ug Dinorado ug, labaw sa tanan, malaslasan ba og dugang P5 ang presyo sa bugas humay sa mosunod nga tulo ka adlaw aron nga mahimo na lang P44 matag kilo inig sugod na og patuman sa SRP ni Piñol.
* * *
Ubos sa Price Act (Republic Act No. 7581), ang mga negosyante makapatong og hangtod sa 10% sa ilang mga baligya nga ubos sa SRP, sa kaso sa lokal nga well-milled rice makapatong lang sila og P4.40 sa SRP nga P44 matag kilo.
Kon moinsistir sa paglansang sa ilang presyo karon nga P49 matag kilo, mahimo silang masilotan og pagkapriso nga gikan lima ngadto sa 15 ka tuig ug multa nga hangtod sa usa ka milyon ka pesos.
* * *
- Latest
