Himbisi gyud ang kandidatong pilion

Niabot na pod ang panahon nga manggawas ang mga plastik pahiyom, agbay ug saad sa mga politiko human ni-file sa ilang Certificate of Candidacy sa COMELEC. Samot na, inig diskurso nila ibabaw sa entablado panahon sa kampanya – ang katam-is gayod tagamtamon sa ilang daghang pasalig nga ambot, pipila lang kaha niini ang matuman?

Ako mismo, nakasinati niining pagpakaaron-ingnong kabuotan sa mga politiko. Naghinangat pod ang lokal eleksiyon niadto. Ang konsehal lumansaray pagka-bise mayor samtang ang bise mayor, pagka-mayor.

Kaming pobreng pundok sa mga Bisayang magsusulat niimbitar nila aron maoy mo-induct sa bag-ong mga napiling opisyales. Pwerteng lipaya namo, kay bisan sa among kakabus, nitungha gyud ang duha ka mahigalaong politiko.

Gani, gikomedyahan namo sila nga sa sunod namong kita ang konsehal,  bise-mayor nay among itahud ug ang bise-mayor, mayor na pod among isangpit. Pastilan, natinuod bitaw na! Silang duha nakadaug gyud!.

Landslide pa! Nakatabang gyud ang among pagpanabi sa katawhan nga ang nahuptan nilang hiyas, bulawan. Busa, walay paglubad!

Pagkasunod tuig,  gisulayan na pod namo silag imbitar sa tinuig namong iduksiyon. Apan bisan usa na lang, wala gyuy niabot. Pwerteng gisia sa among kasingkasing, uy! Kon unsa kahabog ang among panan-aw nila niadtong nagpapili pa sila, mao usab kahabog ang pagkalusno sa among pag-ila sa tinuoray nilang bulok human sila napili. Dili diay sila bulawan nga mogilak forever. Sama sa ubang trapo (traditional politicians), puro gold-plated  ra gyud ang kinaiya nga ilang isul-ob panahon sa eleksiyon.

Hinoon, daghan mang kakulian nga iyaha sa kinaiyahan ang dili mapugngan sa gahum sa tawo. Sama sa linog, bagyo, tsunami ug uban pa. Buang ang tawo kon dili siya makasabot ning maong rason.

Apan asul kaayo ang langit ug daw lana kalinaw ang dagat niadtong adlawa. Walay kalamidad nga himoon nilang hinungdan nganong dili sila makatambong. Pero, nisabot ra gihapon mi. Tungod kay isip mayor ug bise-mayor, daghan gyung lungsoranon ang nagkinahanglan sa ilang serbisyo. Labi nag mga adunahang grupo ang nahimong karibal sa imbitasyon? Aw, kalimtan gyud ang mga yagit!

Unya, maayo kaha ni?

Mao nga mga minahal kong botante, himbisi gyud ang mga kandidato nga inyong pilion ning umaabot eleksiyon..