Pag-angkon sa kapildehan

Gipakalitan nila ni Gobernador Hilario Davide III ug Bise Gobernador Agnes Magpale ang katawhan human sila mag-ilis og posisyon dihang ilang giduso ang ilang Certificate of Candidacy kaniadtong adlaw nga Martes.

Si Gobernador Junjun Davide Magpapili na lamang pagka-Bise Gobernador samtang si Bise Gobernador Agnes Magpale ang miduso sa iyang kandidatura sa pagka-gobernador.

Gipasabot ni Gobernador Junjun Davide nga siya mismo ang niadto sa panimalay ni Bise Gobernador Agnes Magpale kay iya kining gitanyagan sa pagpapili pagka-gobernador sa Lalawigan sa Sugbo.

Gusto sa Gobernador nga masiguro ang kadaugan sa partido ug kaprotehian ang alyansa sa duha. Tungod niini andam siyang mosakripisyo.

Base sa pamahayag sa Gobernador sama sa giangkon niini ang iyang kapildehan batok kang Kongresista Gwendolyn Garcia nga gustong kuhaon pagbalik ang Kapitolyo sa umaabot nga eleksiyon.  

Apan bisan man tuod og pagkakak ang gihimo sa Gobernador sa dili pag-atbang sa kandidatura ni Kongresista Gwendolyn Garcia maingon nato nga minarunong usab ang nahimo niyang hukom. Pagpakita usab kini nga tang-an na sa politika si Junjun Davide.

Usa ka istratehiyang politikal ang gihimo sa Gobernador nga ang tumong ug tuyo mao ang pag angkon gayud sa seguro niyang kadaugan. Sa laktud, segurista ang Gobernador.

Kun imong tuparon si Junjun Davide ug ang iyang kaatbang maingon nato nga naglawig na ang iyang kadaugan sa pagka bise gobernador tungod kay wala pa kaayo mailhi sa Lalawigan sa Sugbo ang iyang makaatbang ug bag-o pa usab kini sa politika. Maingon nato nga ang makaatbang ni Junjun igo lamang nga nisakay sa pangalan sa iyang amahan nga si Kongresista Benhur Salimbangon ug wala gayod kini iyang kaugalingon nga pangalan sa politika sa lalawigan. Magpaila-ila pa kini. Maro ug segurista ang Gobernador.

Ako diay nga pasalamatan si Ms. Jessa Ugalino nga kanunay nagsunod sa akong lindog sa Banat News. Managhan ug manakod ka pa unta sa uban Ms. Jessa.