Kinse (15) ka tuig na ang NEWGAD,INC. o New Generation Against Drugs and Corruption, Incorporated human kini mahimugso kaniadtong Septiyembre 21, 2003. Ang NEWGAD, INC. usa ka organisasyon nga gilangkoban sa mga tinun-an, out of school youth, mga organisasyon nga miuyon sa mga tumong ug katuyoan sa pagmugna niini.
Kabahin sa iyang selebrasyon gipahigayon kaniadtong Septiyembre 29, Sabado sa AVR211 sa Phina Hall sa Southwestern University - Phinma ang usa ka Symposium on illegal drugs diin maoy nahimong resource speaker sila si Dr. Kalachuchi Flores Caballes, Chairperson sa Department of Social Work sa University of Cebu ug ang representante ni Sr. Supt. Royina Marzan Garma nga si PO2 Ramil Yncierto.
Sa iyang pakigpulong sa sobra 300 ka mga sakop sa NEWGAD, INC. gipasabot ni Dr. Caballes ang pagkamahinungdanon sa papel sa pamilya ug higala o barkada sa pagluwas sa usa ka adik. Gipakita ug gihatagan sa iyang kahibawo sa clinical rehabilitation ang mga mitambong sa symposium.
Samtang gipasabot usab ni PO2 Ramil Yncierto ang mga hagit nga nasugatan sa Philippine National Police sa ilang pagpatuman sa gilusad ni Presidente Rodrigo Roa Duterte nga gubat batok sa ginadili nga drugas sama sa mga pagsaway nga ilang nadawat gikan sa Commission on Human Rights ug sa international community.
* * *
Tugoti nga akong pasalamatan ang akong mga higala nga miabag aron magmalampuson ang mga kalihokan sa organisasyon sa iyang padayong pagkampanya batok sa ginadili nga drugas.
Salamat ngadto nila ni Mr. Israel Alin sa Alin Brokerage, Naga Mayor Kristene Vannesa Chiong pinaagi ni Mr. Gary Cabotaje ug sa akong paisano nga si Victor Murcia.
Salamat usab sa mga opisyal sa NEWGAD Students organization nga gipangulohan sa ilang presidente nga si Angel Caban ug sa among Program Director nga si Dr. Norma Cubeta Maratas.
Salamat pud ngadto kang Sulpicio Balansa nga migahin sa iyang adlaw nga Domingo sa paghawid sa among Radio program sa DySS Super Radyo Cebu nga inyong madungog matag alas 9:00 - 10:00 sa buntag ug sa kinatibuk-an nga naglangkob sa Board sa NEWGAD, Inc. Kaninyong tanan daghang salamat.