Nganong nitibugsok
Ang mga panghitabo sa nasud sa unang semana karong buwana (Septiyembre 1-7, 2018) kanus-a nitibugsok ang popularidad ni Presidente Rodrigo Duterte ug ang pagsalig sa katawhan niya makahatag og mas klarong hulagway sa panglantaw sa kinabag-an sa katawhan sa kapin na sa duha ka tuig pamunoan.
Unang nasihag ang kabalaka sa katawhan sa pagsulbong sa presyo sa mga palaliton, labi na sa bugas, ug ang kapakyas sa presidente pagsulbad sa krisis nga siya ra say naghimo (niburot ang inflation rate ngadto sa 6.4%; pagkiha ni Administrador Jason Aquino sa National Food Authority (NFA) tungod sa pagpasimang sa kuwarta nga ipalit unta og tipasi sa mga mag-uuma; pagpamugos sa mga kongresista sa ikaduhang hugna sa bag-ong mga buhis; ug pagtibugsok sa peso).
* * *
Gisalikway sab sa katawhan ang padayong pagpanggukod ni Presidente Duterte sa iyang politikanhong mga kaatbang ug pagdupa sa iyang mga suod:
• Pagpirma niya ang Proclamation No. 572 nga nipapas sa amnestiya ni Senador Antonio Trillanes IV ginamit ang nag-usab-usab nga mga sukaranan;
• Pagdumili sa kapolisan pagdason sa iyang pasangil nga tinubdan sa shabu ang Naga City, pinuy-anan ni Bise Presidente Leni Robredo;
• Pagbasura sa mga kongresista sa impeachment complaint batok sa pito ka mahistrado sa Korte Suprema nga nipalagpot ni kanhi Chief Justice Maria Lourdes Sereno;
• Pagpaluyo sa partido sa iyang anak sa kandidatura nilang Imee Marcos ug Jinggoy Estrada; ug
• Pag-insistir sa mga Tulfo nga legal ang ilang pagpahimus sa katungdanan sa ilang igsuon nga si kanhi Tourism Secretary Wanda Teo.
* * *
Inanay nang napupos ang pailob sa katawhan pagpaabot kanus-a mapatuman ang gisaad nga kausaban (pagpamomba sa Sultan Kudarat ug pasidaan sa Malakanyang nga lugwayan na sang martial law sa Mindanao lapas karong tuiga; ug padayong pagsulbong sa ilegal nga drugas bisan sa hapit matag adlaw nga pinatyanay).
Nitumaw ang dugang mga ebidensiya sa kakuwang og direksiyon sa iyang pamunoan (paglalis sa iyang kaugalingong economic managers sa P253 bilyones nga gasto sa pederalismo; pagkabara sa Ninoy Aquino International Airport sud sa tulo ka adlaw tungod sa naaberiya nga ayroplano ug padayong paghuot sa trapiko; ug pagpanagang nga Davao City ang kinadaghanan og lugos kay daghang guwapa sa ilang kababayen-an.
* * *
- Latest
