Kon wa pa lang unta isalikway dayon sa Malakanyang ang mga sugyot ni kanhi Interior ug Local Government Secretary Mar Roxas, ila untang hangpon nga ang labing higpit nga karibal ni Presidente Rodrigo Duterte sa niaging piniliay’ng presidensiyal wa manaway, hinunoa nisumiter og posibleng mga sulbad sa krisis sa bugas humay.
Angay sang pahinumdoman ang Malakanyang nga sa niaging kampanya nisaad si Presidente Duterte sa pagsentro sa iyang atensiyon sa kampanya batok sa drugas ug kriminalidad ug nga mangopya na lang sa ekonomikanhong mga programa sa iyang mga kaatbang.
* * *
Sa iyang Facebook post, nidiretso si Roxas sa pagsugyot nga motidlom lang ang presyo sa bugas humay kon madugangan ang suplay sa labing daling panahon. Nga mahimo lang pinaagi sa:
• Pagtugot sa pribadong mga negosyante sa pagpangompra og hangtod sa usa ug tunga ka milyon ka tonelada sa bugas humay;
• Tangtangon ang tanang wa kinahanglana nga mga babag nga gipahamtang sa National Food Authority (NFA); ug
• Awhagon ang labing dagkong konsumidor sa bugas humay sama sa Jollibee, McDo, Mang Inasal, SM ug ubang higanteng mga tindahan sa pagpangita sa ilang kaugalingong tinubdan aron di sila makaiban sa nasudnong imbentaryo.
* * *
Gipasabot ni Roxas nga ang mga lakang mosangpot dayon sa:
• Paglambo sa suplay sa bugas humay nga mas daghan kay sa nasudnong konsumo;
• Klarong kinutoban sa kanihit sa suplay nga maoy nakapasulbong sa presyo; ug
• Mapugos ang mga negosyante nga nitago sa ilang bugas humay sa pagpagawas dayon sa ilang suplay sa di pa maapsan sa mas ubos nga presyo.
* * *
Ginamit ang adunahang kasinatian sa paghupot sa nagkalainlaing katungdanan sa mga gabinete nilang Joseph Estrada, Gloria Macapagal-Arroyo ug Noynoy Aquino, gihimo ni Roxas nga labing yano ang problema ug sulbad:
• Dinaliang pagpalambo sa suplay pinaagi sa importasyon (sukwahi sa gihimo sa pamunoang Duterte nga anam-anam nga pagpangompra pinaagi sa monopoliya sa NFA); ug
• Ang abundang suplay mas epektibong mobadlong sa mga maniobra (kay sa way nahimong mga ronda sa mga bodega sa bugas humay).
Makapasubo nga inay hangpon ang bag-ong mga ideya human napakyas pagsulbad sa krisis, gipili sa Malakanyang ang pag-insulto ni Roxas pinaagi sa paghinumdom sa iyang mga bulilyaso sa bagyong Yolanda.
* * *