Ang kadagkoan sa Land Transportation Office (LTO)-7 nagpagawas kaniadtong Biyernes og public announcement nga sila ra gyud maoy gihatagan og katungod sa balaod pagsakmit og lisensya sa mga drayber, ingon man ang pag-impound sa mga sakyanan.
Gipahimangnoan sa LTO ang publiko kabahin sa ilang katungod nga ang ilang lisensya dili gyud ipasakmit sa mga tawo nga dili organic members sa LTO, ug dili mga deputized agents. Gitumbok nila ang balaod nga gilatid sa Section 29 sa Republic Act 4136.
Mao ba kini ang nakapatalawan ni Konsehal Jun Gabuya nga wala niya idayon ang iyang gisugyot nga ordinansahon nga maghatag unta og gahom sa mga CITOM enforcers pagsakmit og lisensya sa mga drayber? Gitakda na man gud unta kaniadtong Martes ang final deliberation sa maong ordinansahon aron aprobahan sa konseho.
Apan naunsa ba, misibog man si Konsehal Gabuya, ug gi-withdraw man ang iyang gisugyot nga ordinansahon? Tinalawan kining gihimo ni Konsehal Gabuya. May legal opinion na man kaha ang City Legal Office nga ang mga Local Government Unit (LGU) kabahin niini?
Gi-interview sa reporter ang konsehal, miingon ni nga iya na lang usab nga i-file pagbalik ang maong ordinansahon. Kon mao na, alang sa unsa nga tumong? Magpatawag na usab og public hearing? Ang mga tawo nga gipatawag ninyo, inyo na usab nga imbitahon? Usik-usik lang sa oras!
Ang tinuod, gibasa man gyud nako ang Land Transportation and Traffic Code, tinuod gyud nga gilatid diha nga ang mga “designated” lang sa Land Transportation Commission (LTC), nga karon gitawag na og LTO, ug mga government employees maoy gitugotan nga kaisyuhan og TOP.
Base sa balaod, ang lisensya sa drayber masakmit lang kon ang nagdakop moisyu og Temporary Operators Permit nga magtugot sa drayber pag-drive sulod sa tulo ka adlaw, gikan sa oras nga siya nadakpan.
Ang gihimo unta ni Konsehal Gabuya, wala niya gi-withdraw ang ordinansahon, ug kon kini maaprobahan, bahala na kadtong moreklamo nga mopasaka og kaso batok sa CITOM, ug sa kadagkoan sa siyudad. Hangtud nga dili kini madeklarar sa korte nga ilegal, magpabilin nga ang ordinansa, usa ka legal.
Susama ra nga ang kamandoan sa mayor nga i-impound ang mga sakyanan nga masakpan nga mo-counterflow, magpabilin nga legal hangtud nga may mokiha ug kwestiyonon kining maong kamandoan ug ang korte mohukom nga kini ilegal ug ipahunong na ang pagpatuman.
Para kanako, pabor ko nga ipang-impound ang mga mo-counterflow kay bastos kaayo ang mga drayber nga mosugat ra gyud sa bul-og sa mga sakyanan. Sa laktud, mga salbahis!