Sugdan na sa gobiyerno sunod semana ang pag-import og isdang galunggong kon budboron aron kuno pagsiguro nga dunay igong suplay sa maong matang sa isda diha sa merkado.
Si Agriculture Secretary Manny Piñol mihatag sa pagtugot alang sa pag-import og isdang tamban hangtud sa 17,000 metric tons. Ang importation gipaabot nga molanat hangtud sa Disyembre.
Gipaniguro sa gobiyerno nga ang importation hugot nga bantayan sa Bureau of Fisheries and Aquatic Resources o BFAR nunot sa pagtahap nga dili luwas ang imported nga isda alang sa mga konsumidor. Dunay pasangil nga posibling gibutangan kini og formalin aron magpabiling lab-as tan-awon.
Di pa siguro asa paliton ang imported nga isda apan basi sa record sa Philippine Statistics Office, nakasuway na og import ang Pilipinas gikan sa China, Taiwan ug Vietnam niadtong 2016.
Ang pangutana, nganong gikinahanglang mo-import ang gobiyerno og isda gikan sa laing mga nasud? Matud sa Department of Agriculture nagkuwang na kuno ang production sa maong matang sa isda nga maoy sagad konsumo sa mga kabus hinungdan sa pagsaka og maayo sa presyo niini.
Kon mopalit ang gobyerno og isda sa laing nasud makontrolar niini ang presyo ug masiguro nga dili molabaw sa P140 ang matag-kilo. Laing pangutana, unsa may hinungdan sa pagminus sa production niini dinhi sa nasud?
Ang maong pangutana maoy angayang tubagon sa gobyerno. Sa akong tan-aw ang hinungdan nganong minus ang production niini ug misaka ang presyo diha sa kamerkadohan mao ang pagdyutay sa mga mananagat.
Ang hinungdan niini tungod sa kamahal sa gasolina. Daghan sa mga mananagat ang mas gipili nga maghabal-habal kaysa pagpanagat tungod kay ang gagmay nga mga mananagat wala gyuy dag-anan sa mga commercial nga panagatan.
Napakyas ang atong gobyerno pagprotehir sa gagmay nga mga mananagat gikan sa mga dagkong panagatan nga niabuso. Kon mo-import ang gobyerno og isda mosamot intawon nga makulban sa kaldero ang dyutay nga nahibilin nga mga mananagat nga padayong nagsalig sa ilang panginabuhi diha sa dagat.