Unsay sangpotanan niining pagputol ni Cebu City Mayor Tomas Osmeña sa suporta sa siyudad alang sa maintenance ug rehistrasyon sa mga sakyanan nga giisyu sa lokal nga kagamhanan ngadto sa Cebu City Police Office?
Aw, klaro nga mapiang gayud ang operasyon sa kapolisan niining lakang sa mayor.
Ug nagpasabot kini nga molurang ang kapabilidad sa otoridad paggukod niadtong mga badlungon sa katilingban.
Bisan ang liderato sa Police Regional Office-7 miangkon nga adunay dakong epekto sa operasyon sa kapolisan ang pagbawi sa maintenance support sa dakbayan sa mga sakyanan sa kapolisan tungod lagi niining tensiyon tali ni Osmeña ug liderato sa CCPO.
Hinuon mapugos gayud ang PRO-7 pag-abaga sa maintenance sa mga patrol car sa CCPO.
Ug usa sa paagi nga ilang nakita mao ang paggamit unya sa kapolisan sa mga sakyanan sa barangay panahon sa ilang pagresponde sa mga krimen.
Dili maayo nga lakang sa mayor ang pagputol sa suporta sa kapolisan.
Kini gumikan kay nabutang na hinuon sa kompromiso ang seguridad sa katawhan niining dakbayan kon limitado na unya ang dagan sa mga sakyanan sa kapolisan.
Basin baya kon mosaka ang krimen sa siyudad nga dili masulbad sa kapolisan tungod sa paghinay sa ilang kapabilidad tungod lagi sa kakulang sa ilang kahimanan pagpatunhay sa kahusay ug kalinaw.
Ug kinsay dakong maalaot niini? Wala nay lain kondili mismo ang katawhan niining dakbayan. Sigurado gayud nga mabutang sa alanganin ang seguridad sa katawhan, lakip na kadtong mga dumuduong, kon maglisod na pagresponde ang otoridad.
Angay kini nga hunahunaon ni Osmeña. Kay basin kon siya na unya ang tulisokon sa mga molupyo sa dakbayan kon magkagrabe na unya ang mga krimen dinhi ug sama sa giputlan og pako ang kapolisan nga dili kasulbad.
Hapit na ang sunod eleksiyon ug sigurado nga gamiton sa iyang kaatbang sa pulitika kining aksiyon ni Osmeña batok sa kapolisan atol unya sa kampanya. Klaro nga dako kini og epekto sa iyang kandidatura.
Sa akong nakita, maayo ang performance sa kapolisan karon sa ilang kampanya batok sa krimen. Gani, tungod sa ilang panghingusog, daghang mga sagbot sa katilingban ang mikagiw na gikan sa dakbayan.
Ug angay pa unta nga mas itodo pa sa lokal nga kagamhanan ang suporta niini ngadto sa kapolisan aron nga magmadaugon ang otoridad sa ilang krusada batok sa kriminalidad.