Maisip gyud nga dimalas kaayo si Tejero Barangay Konsehal Jessielou Cadungog kaniadtong Lunes kay kon ibutang nato nga tinuod nga siya ang target nga patyon sa polis, patay siya.
Apan bisan og wala mapatay si Cadungog, ug gani ang polis man maoy napatay sa iyang bodyguard, maisip gihapon nga dimalas si Cadungog kay gikiha na man hinoon siya og murder sa kamatayon sa polis.
Sayonan ka og murder ang ipasaka batok kanimo? Kon mahitabo nga ang prosecutor nga nagdumala sa kaso makakita og basehanan nga ipasaka gyud sa korte ang kaso, sigurado ka gyud nga mapriso.
Unya, ang kaso ra ba nga murder wala gyuy piyansa, gawas lang kon ang abogado sa gikiha, makakumbinser sa huwes nga lugak ang kaso batok sa iyang kliyente.
* * *
Ang pagtan-aw nako niining maong kaso mao kini. Una, giangkon sa bodyguard ni Cadungog nga siya maoy nakapatay sa polis nga si PO2 Eugene Alain Calumba.
Ikaduha, ang armas nga iyang gigamit dili iya sa bodyguard, gipanag-iya kini sa konsehal, apan nagamit paghimo og krimen. Wala kuno si Cadungog sa sakyanan atol sa maong higayon.
Ang pangangkon sa bodyguard ni Cadungog mao nga mipidpid sa gimaneho niyang sakyanan ang motor nga gisakyan ni PO2 Calumba, ug nakita niya kini nga nilanit og armas, ug paingon na nga motira ngadto sa sakyanan.
Kay natunog na man lagi nga dunay mga riding-in-tandem nga mamusil og mga tawo, midepensa siya sa kaugalingon pinaagi sa paggamit sa armas nga giingong nabiyaan ni Cadungog sa sakyanan.
Ang nindot unta mao nga si Cadungog nagpakuha og paraffin test atol sa maong higayon aron pagmatuod nga wala siya makapabuto og armas. Magamit kini niya nga pang-alkontra karon nga gikiha na siya og murder.
Kuyaw man gud ni kon ang kapolisan makakuha unya og lig-ong testigos nga makamatuod nga si Cadungog diha ra gyud sa sakyanan ug nga dili tinuod nga gibiyaan niya ang driver nga gisugo niya pagpagasolina.
Lain pa’ng isyu, mora’g manubag usab si Cadungog, bisan pa og ibutang nato nga ang iyang driver-bodyguard maoy nakapusil ni PO2 Calumba kay ang iyang armas maoy nagamit sa krimen.
Angay gyud nga may CCTV footage unta nga magpakita sa hitabo diha sa maong dapit aron magmatuod sa duha ka punto.
Una, ang kampo nila ni Cadungog miingon nga mibunot na unta og armas ug paingon na nga pusilon ang sakyanan sa kapitan, mao nga giunhan kini pagpusil sa bodyguard.
Apan ang kapolisan miingon nga walay gihimo si PO2 Calumba nga nag-angkas lang sa motor ug gikalitan lang pagpusil sa bodyguard ni Cadungog.