Kalingawan sa mga senior citizen

Kasagaran natong mga senior citizen, magpuyo na lang sa balay kaylagi, kapoy na. Magpunay na lang og tutok sa kisame, dili na ganahang molihok. Grabe ang pag-andar sa tapol, ilabi na kon daan kitang tapolan sa bata pa nga lagsik pa ang kalawasan.

Hinumdom ko nga sa diha pa sa Fuente Osmeña circle ang nahimong jogginganan sa mga health conscious nga mga Sugbuanon, dunay usa ka tigulang nag-jogging. Usahay mag-brisk-walking na lang, nagsunodsunod kaniya ang luho niyang kotse.

Maoy paniid sa ubang nag-exercise nga lagmit sa bata pa ang maong tigulang, pirme siyang magsakay sa iyang kotse. Dili gyud molakaw, ug karon nga maglisod na siya’g lakaw, mao pa’y iyang paglakaw.

Unta sa bata-bata pa siya nga kusog pa nga molakaw, naglakaw-lakaw na siyang daan, ug dili na unta kinahanglan pa nga magsunod-sunod kaniya ang iyang kotse.

Ania kining gikan sa Internet, atong kutloon. Mga ideya, mga fun activities for the elderly. “There are many fun activities elderly people can take part to keep their minds sharp, bodies strong and spirits high.

“Whether it’s spending time outdoors, playing games with family and friends, or spending time on a favorite hobby, doing things they love, can benefit the overall wellbeing of all seniors.”

So, daghan pa ta nga mahimo inay nga magtanga na lang. Gawas nga mosamot ang kakapoy kon dili na kita maglihok, giingon nga ang idle mind maoy himoon nga workshop sa devil. So, let’s keep ourselves always busy.

Gitambag nga aron dili kita magluya, is to keep ourselves active for at least 30 minutes a day. Bisan sulod sa atong panimalay daghan man kita’g mahimo. Mga household chores, dili kita magsalig kanunay sa mga kaabag sa panimalay.

Sa America, ang ilang AARP, kon American Association of Retired Persons, ang ilang Senior Citizen Centers, nagtanyag ning mosunod nga kalingawan ug kalihokan: card & board games, arts & crafts, exercise, yoga or tai chi classes, educational programs, trips, dances, lectures, ug support services and resources for seniors.

 Mao usab unta kini ang atong kapahimuslan kon duna pa unta kita’y klaro nga senior citizens center dinhi sa atong dakbayan. Unsaon nga medyo wala na may kalihokan karon ang atong mga senior, gawas sa paghuwat kanus-a ipanghatag ang cash assistance.

Hangtud gani karon, wala pa kita’y OSCA head sa dakbayan, nga mao unta ang magpasiugda sa mga kalihokan, gawas sa pagpamirma sa mga OSCA IDs. Next time: cognitive activities for the elderly.