Usa sa dili kabentahaan nga prutas ang saging, nga ang uban nakamenus (underrated) sa kabililhon sa mahatag niini nga kahimsog sa panglawas. Ang saging, usa sa nabaniog o labing popular nga pagkaon sa tibuok kalibutan. Gumikan sa perpekto niini nga gidak-on, nga natural nga giprotektahan sa iyang panit ug sa menus nga presyo nga maabot kaayo sa tanan.
Nasayod ba kita nga ang saging, naghatag og makapahingangha nga benepisyo sa kahimsog sa panglawas?
Ang pagkaon og duha ka saging kada adlaw, igo na makatabang sa pagkontrol sa hayblad, hamugaway nga pagpagawas sa hugaw, pamenus sa timbang ug pagprotehir sa maayo nga panan-aw.
Ang saging, nagbaton og natural nga asukar nga ‘sucrose’ ug ‘fructose’, nga maoy naghatag sa katam-is niini. Apan dasok usab kini sa mga bitamina, minerales, ug ‘fibers’, sa paghimo og makahimsog nga paniudto. Sa partikular, naghatag sab kini og bitamina C ug B6, manganese, ug potassium.
Ang naandan nga gidak-on sa saging, adunay 467miligramos nga potassium, ug 1 ka mg lang nga sodium. Igo na kini nga proteksyon batok sa pagbara sa mga arterya (atherosclerosis). Gawas sa presyur sa dugo ug sa kasingkasing (cardiovascular) nga benepisyo, ang potassium sa saging, motabang sab sa pagpamenus sa calcium sa ihi ug sa pagpalig-on sa nagkagabok nga bukog.
Sama sa ubang prutas, ang mga nutrens sa saging, mausab samtang magkahinog nga mo-yellow na, mosaka ang lebel sa ‘antioxidant’, nga mosanta batok sa kasingkasing ug sa kanser.
Sa pagtuon didto sa Japan, nakita nga ang panit sa saging nga hinog na kaayo, nga gitumtom o mga puntik nga itom, nagprodyus og daghang TNF.