Dear Atty. Divine,
Duna ko’y pangutana labot sa gibilin nga property sa among ginikanan. Namatay ang akong papa last year, apan unang namatay ang akong mama.
Lima mi ka igsuon ug ang duha tua sa US ug pulos na mga US citizen.
Ang akong pangutana, kon dapat pa ba silang bahinan sa kabilin sa among mga ginikanan nga considered na man sila nga mga foreigner?
Dili ba ang foreigner dili man makapanag-iya og yuta sa Pilipinas? Daghang salamat. — Rudy
Dear Rudy,
Ang imong duha ka igsuon entitled gihapon og share sa kabilin sa inyong ginikanan bisan kon sila mga US citizen na.
Base sa atong balaod, ang foreigner dili makapanag-iya og yuta sa Pilipinas, except by way of succession, ug kana maoy nalatid sa Sec. 7, Art. XII sa atong Constitution.
Buot ipasabot nga kon pinaagi sa succession, kon pag-inherit mahimong makapanag-iya og property ang usa ka langyaw sama sa imong duha ka igsuon nga mga US citizen na.
Busa kon mo-execute mo og Extrajudicial Partition sa kabilin sa inyong ginikanan, apil gyud sa binahinay ang duha ninyo ka igsuon nga tua sa US. Thanks and God bless. — Atty. Divine
* * *
Alang sa inyong pangutana, ipadala lang sa Legal Corner sa Banat News sa V. Gullas St., Cebu City or email sa flores_divina@yahoo.com ug akong tubagob ang inyong pangutana pinaagi sa akong column matag Miyerkules, Sabado ug Domingo.