Inocoyan

Agi sa bati nga dalan kami nitadlas sa may Oligmat ug gikan didto lakaw og taud taud aron sa Inocoyan moabot. Niagi mi og sapa, nitungas sa bukid nga mahabog ug nisuot suot sa mga dalan nga makalibog aron sa Inocoyan makaabot.

Tuod man human sa dul-an sa oras nga panaw nahiabot mi sa gamay nga kapilya. Didto nakita namo ang dul-an sa biyente ka mga manimbahay. Apan human sa kasaulogan ang tanan mapasalamatong mihatag sa ilang pagtimbaya.

Ang halayo nga panaw ug pagbaktas nahimong makahuloganon tungod kay nakita man nga luyo sa kalisud anaa ang katahum. Ug luyo sa katahum anaa ang kalinaw. Tinuod gyud diay nga daghan sa mga matahum ang giisip nga tinago ug matag tinago nahimong mapadayag lamang kun kini hatagan og kahigayonan nga mapadayag.

Ang matahum nga kinabuhi, kinabuhi sa hataas nga proseso ug ang matag panaw mahimong sinugdanan sa pagkat-on og pagtahud sa liyok sa kinabuhi. Daghan kong nakita ug kabahin sa akong nakita mao ang akong kaugalingon nga naningkamot nga mosud-ong sa proseso sa kinabuhi ingon nga panaw sulod sa hataas nga panahon.