Dako kaayo karon ang kalipay sa mga taga Cebu ug labaw sa tanan ang lungsod sa Alegria tungod sa pagsugod na sa produksyon sa lana ug natural gas nga opisyal nang gibuksan ni Presidente Rodrigo Duterte niadtong Sabado.
Ang lana ug natural gas usa sa mga giilogang mineral nga makuha gikan sa kinailawman sa yuta nga gigamit karon sa pagpadagan sa mga makina ug nagsilbing dugo sa mga industriya.
Kadtong mga lugar nga aduna niini, sama sa Middle East, bisan tuod og nihit sila sa mga kahoy, kasapaan, bulawan ug ubang mineral nadato gihapon sila tungod sa petrolyong mamugna gikan sa lana nga nakuha gikan sa ilang disyerto.
Ang nasud sa Brunei Darussalam bisan sa kagamay sa teritoryo niini, namungingi man sab sa mga oil fields mao nga adunahan pa sila kon itandi sa Pilipinas.
Ang maong nasud silingan ra sa Pilipinas busa dili imposibleng aduna say mga lana dinhi nga wala pa madiskubrehi.
Ang pagpangita niini ug pagsugod og baligya dili problema kay abagahon man kini sa mga pribadong ka-partner sa gobiyerno.
Apan ang dunay dakong kwestyon mao ang pagbinahinay sa kitaon gikan niining gasa. Padung ba sa kalamboan sa lugar ug sa katawhan niini o basin padung lang sa bulsa sa pipila ka mga mapahimuslanon?
Kon maayo lang pagbahin ug gastuhon sa maayong pamaagi ang makuhang porsiyento gikan sa halin siguradong ang lungsod sa Alegria mas molambo ug mosaka ang klasipikasyon itandi sa mga silingan niining mga lungsod.
Paabuton gyud sa mga taga Alegria ang bunga sa maong oil field kon makatagamtam ba sila og kaayohan.
Hinaut nga ang mga opisyales sa lungsod nga mao unyay modumala niini sigurohon nga may padulngan ang kwarta. Kay motug-an man sila o sa dili, mogawas man gyud ang kamatuoran.
Ang padulngan sa kinitaan gikan sa bahin mao gyud kini ang pangitaon unya sa mga botante.