Nagsugod na

Nagsugod na pagpanglukso ang mga kapitan ug ubang opisyal sa kabarangayan ngadto sa Bando Osmeña Pundok-Kauswagan (BOPK). 

Ang pagpanumpa sa kapitan sa Barangay Guba ug sa iyang mga konsehal ngadto kang Mayor Tomas Osmeña maoy timailhan nga nagsugod na ang giingon sa mayor nga daghang opisyal sa kabarangayan nga alyado sa Team Rama nga gustong motapon sa BOPK.

Duna pa’y pipila ka kapitan diha sa bukid nga bahin sa dakbayan sa Sugbo nga kaniadto ra untang wala pa ang eleksiyon gusto nga mobali, apan wala dayon dawata ni Osmeña.

Utokan usab ang mayor kay gusto lang niya nga siguroon nga ang maong mga kapitan lig-on gyud ug kon sila modaog, anha pa nga higayona nga sila dawaton sa BOPK.

Husto man sab kay ang uban sa mga kapitan nga mipadayag nga mobalhin sa BOPK, nangapilde man.

Ambot og dili ba kaha maikog ang ubang kapitan nga biyaan nila si Bise Mayor Edgardo Labella nga pwerte ra ba gyud nila nga pagdayeg niini kaniadto ug gipasaligan nga mao gyud ang ilang suportahan.

Ang baruganan hinoon ni Labella mao nga dili niya igsapayan nga mahutdan siya sa mga kapitan kay ang katawhan man maoy mopili kon kinsa ang tugyanan sa pagdumala sa renda sa siyudad.

Nagtuo man gyud ko nga ang PDP-Laban mopadagan gyud ni Labella nga mao ang kandidato nila sa pagka mayor dinhi sa dakbayan.

Apan ang nakaproblema niini, kay si kanhi mayor Mike Rama mipadayag usab nga modagan siya pagka mayor, gawas lang kuno og masuspenso si Osmeña ug nga si Labella maoy mag-OIC mayor.

Pastilan, kon silang duha si Rama ug Labella parehong managan sa pagka mayor, tihoy-tihoyan lang sila ni Tommy, ug sigurado nga magkabunbon ang ilang simod kay mahisukamod man sila human sa eleksiyon.

Kinahanglan nga usa ra gyud kanila maoy makigsangka ni Tommy nga misamot na kalig-on kay siya gud ang mayor.

Lisud na pildehon si Tommy kay wala man gani siya mapilde nga si Rama pa ang mayor, karon pa kaha?

Para ni Rama, mora’g subidahon gyud ang iyang tinguha nga modaog pagbalik. Asa pa kaha mokumpiyansa si Tommy.

Kaniadto gud nga 2013 elections, kumpiyansa ra gyud kaayo si Tommy kay gani, dili man motambong sa mga pulong-pulong kon kapoyan na.

Apan pagka 2016 elections, si Tommy gawas nga seryuso na kaayo nga mouban sa mga kampanya, balikon pa gyud niya ang ubang mga dapit aron ipasabot pag-ayo ang isyu nga wala masabti sa katawhan.