Ugma eleksiyon na sab sa barangay, laing higayon nga atong magamit ang usa sa labing sagrado nato nga katungod isip lumolupyo ning atong nasud, ang pagpili sa atong mga opisyal.
Ugma, atong pilion ang usa ka kapitan ug pito ka konsehal sa tagsa-tagsa nato ka barangay, ingon man usab ang SK chairman ug iyang mga konsehal nga maoy magdala sa tingog sa kabatan-onan.
Ang mga modaog karong Lunes maoy mahimo natong opisyal sa barangay sa mosunod nga tulo ka tuig. Busa atong hinumdoman sa atong pagsulod sa presento ang taas nga panahon nga kita mag-antos sa mga tapolan ug kurakot nga mga opisyal kon kita masayop pagpili nila.
Sayon ra nga ilhon ang mga kandidato nga ligoy ug posibleng kawatan. Usa sa timailhan nila kadtong mamalit sa inyong boto. Laing timailhan labi pa niadtong mga nagpasubli na sa katungdanan, karon nalang ninyo sila nakit-an pagbalik nga misuroy sa inyong sityo panahon sa kampanya.
Ang uban nila nikalit lang og kabuotan, kamao na mosimba panahon sa Domingo. Apan diay ang tuyo dili ang pag-ampo kon dili ang pagpangampanya.
Dia pa’y laing posible nga magamit natong giya sa pagpili sa atong sunod nga mga opisyal sa barangay dinhi sa dakbayan sa Sugbo.
Sa miaging mga adlaw, sagunson ang mga kaso nga gisang-at ni Mayor Tomas Osmeña sa mga kapitan nga wala makahatag og kwentada sa ilang nadawat nga ayuda gikan sa dakbayan.
Labing menos 58 sa 80 ka kapitan sa dakbayan sa Sugbo ang gikiha sa mayor og graft and corruption didto sa Ombudsman kay napakyas sila paghatag og subay giunsa nila paggasto ang minilyon ka pesos nga kwarta nga ilang nadawat.
Ang uban niining maong mga kapitan, kon dili man tanan, pulos kandidato karong Lunes. Busa atong susihon og maayo kon gigasto ba nila sa inyong barangay ang kwarta pinaagi sa serbisyo ug mga proyekto.
Kon wa’y klarong serbisyo ug proyekto nga nahimo ang maong mga kapitan diha sa inyong barangay, dako ang posibilidad nga ilang gibulsa ang maong kwarta hinungdan nga dili sila kahatag og kwentada.
Busa wa’y rason aron sila sublian ug hatagan sa laing higayon sa pagpangurakot! Ayaw pahaylo sa kwarta ug ayaw ibaligya ang imong boto.