Dakong adlaw ugma alang sa mga mamumuo sa nasud. Sa makausa pa, isaulog na usab ang Labor Day pinaagi sa mga martsa sa kadalanan sa mga militante nga grupo nga gusto og dugang nga mga benepisyo.
Hagbay ra kining mga yangungo sa mga trabahador. Ilang nakita nga sa hataas nga panahon, nagkulang gayud ang kagamhanan ug ang sektor sa patigayoan paghatag kanila og dugang nga mga benepisyo.
Mao na nga dili usab nato sila mabasol kon sige usab sila sa ilang mga mulo batok sa kagamhanan ug sektor sa pamatigayon. Gani matag Labor Day, dili gayud sila mapakyas sa ilang pagsiyaok sa mga reklamo sa kadalanan.
Hinuon, sa bahin sa sektor sa patigayon, dili usab nato sila mabasol kon dili sila kahatag sa mga yangungo sa ilang mga trabahante. Nahibalo usab kita nga sa ka krisis sa ekonomiya, hinay na usab ang dagan sa negosyo.
Apan sukad pa man sa una, dili gayud magkasinabot ang mga mamumuo ug ang tagdumala sa negosyo. Kini tungod lagi kay puro sila dili paalkanse. Kon unsa gani ang demanda sa mga trabahante, dayon usab og babag ang management.
Kay dili lagi sila magkahiusa, naanad na usab ang mga mamumuo nga isiyagit sa karsada ang ila nga mga yangungo. Mao na nga dili na ikatingala pa kon daghan usab sa mga trabahante ang madala sa mga labor organization.
Ang Labor Day usa ka kasaulogan isip pahinungod sa mga mamumuo sa ilang dako ug importante nga kontribusyon sa kalamboan sa ekonomiya sa nasud. Adlaw unta kini sa selebrasyon ug sa pagmartsa sa karsada.
Tungod lagi kay kulang usab sila sa benepisyo, dili na gayud mapugngan pa ang protesta sa mga mamumuo. Kini ilabi na sa kakulang usab sa kagamhanan pagtabang sa ilang kahagip-ot sa kahimtang.