Sama sa suliran sa gidiling drugas, lisud usab puohon ang paggamit og plastic. Bisa’g daghan na ang nangamatay sa kampanya batok sa illegal drugs, wala gayud kini masanta tungod kay sige man ang pag-manufacture ug pagsulod niini nganhi sa atong nasud.
Unsaon, ang gigukod pag-ayo mao man ang mga drug pusher ug user, samtang wala kita makadungog nga dunay nadakpan ug napatay nga mga manufacturer niini. Kon ang maong mga illegal drugs gikan man sa gawas, nganong wala pa may gidakop nga mga tigpayuhot niini?
Ang saad ra ba nga in three months, na-extended to six months, sulbaron ang drug problem.
Mao usab kini sa kampanya batok sa plastic, lisud kining puohon tungod kay nagsige man ang pag-manufacture niini. Of course dako kining negosyo sa mga plastic manufacturer, ug ang gobiyerno hadlok mo-ban sa pag-manufacture niini.
So, again, sama sa drug problem, ang plastic pollution problem lisud santaon tungod kay dili man masanta ang pag-manufacture niini. Sama usab sa habal-habal ug angkas, bisa’g klaro kaayo nga ilegal, dili masanta tungod kay hadlok ang gobiyerno, ambot unsa’y gihadlokan, ilabi na nga giisip kini nga ilang solusyon sa problema sa trapiko.
Sa usa ka pagtuon nga gihimo kabahin sa sulod sa ginhawaan sa mga isda sa kamerkadohan sa California ug Indonesia, nakita nga usa sa kada napulo ka isda, “one in four fish in the two locations had plastic particles in their guts.”
Kuyawa no? Unsa kaha dinhi sa atong nasud no? Atong mahulagway ang kadako sa kadaot nga nahimo sa plastic pollution, dili lang batok sa kinaiyahan, kon dili, batok sa panglawas sa tawo.
* * *
Niay nindot nga balita, ilabi na kanatong mga Katoliko, ug niadtong manalipod sa kabalaan sa pamilya. Giingon dinhi: “Duterte seals fate of divorce bill,” kini sumala ni Party-list Representative Lino Atienza, kanhi mayor sa Quezon City .
Ang pagsupak ni Presidente Digong Duterte sa divorce bill, nagsilyo sa maong balaudnon. “The bill is now dead,” padayon ni Atienza.
Hinumdoman nga ang mga kongresista, ang atong mga tinugyanan sa Kongreso, nipasar niini, gumikan tingali nga naproblema sila sa ilang mga asawa o bana. Apan, tungod kay matud ni Duterte, “my daughter is not happy with it,” patay na ang maong balaodnon. Wala’ counterpart bill ang Senado.
Padayon ni Atienza: “The president has saved the Filipino family with his strong position against divorce. We strongly agree with the president that divorce would be very detrimental to mothers and children.”