Bangis nga laang sa utang
Human nakigsuod si Presidente Rodrigo Duterte sa China, nga katulo na niya duawa sukad siya nibanos sa Malakanyang, gibalikbalik sa iyang pamunoan ang dagkong kaayohan nga napahimuslan na sa mga Pilipinhon:
Niusbaw ang tabang sa China alang sa mga biktima sa gubat sa Marawi City ug ubang katalagman;
Nisulbong ang gidaghanon sa mga turista gikan sa China nga mahimo gani nga ila na nga maapsan ang Koreans karong tuiga; ug
Motabang ang China pagtukod sa higanteng mga proyekto, apil na ang bag-ong kalibutanong pantalan sa Consolacion ug bag-ong mga riles sa tren sa Luzon ug Mindanao.
* * *
Nipasalig si Presidente Duterte nga wa’y gipangayo ang China nga bisan unsang bugti sa tanang tabang nga ila na nga nahatag.
Apan may makapabalaka na ang mga timaan nga ang mga tabang mahimong may pakapin nga gapus:
Wa na’y ek ang presidente sa sibaw nga mga ebidensiya nga gitugpahan og mga ayroplano sa gubat ug gidunggoan og mga barko sa gubat ang kabahin sa atong teritoryo sa Spratlys; ug
Padayon nga gitago sa Malakanyang unsa na kadako ang atong nautang gikan sa China ug kon unsa kataas ang interes.
* * *
Abunda ang sukaranan sa mga pasidaan nga mahimong mahitumpawak ang Pilipinas sa bangis nga laang sa utang sa China. Labing bag-o nga pagmatuod mao ang pagtugyan sa Sri Lanka sa ilang pantalan ngadto sa China kay dili na makabayad sa nagbuntaog nilang utang.
Giisip nga pagtahan sa kabahin sa ilang nasudnong teritoryo ang pagpaabang sa Sri Lanka sa pantalan sa Hambantota sa mosunod nga 99 ka tuig aron matipakan og gamay ang kapin sa $8 bilyones nilang utang sa China.
* * *
Nagkataas na ang listahan sa kabtangan sa ubang kanasuran nga nakuha sa China tungod sa pinatuyangan nila nga pagpautang:
Ang pantalan sa Piraeus sa Mediterranean nga napalit sa China bali og $436 milyones gikan sa nabangkarota nga Greece sa niaging tuig;
Kay nalubong man sa utang, gitugotan sa Djibouti ang pagtukod sa labing una nga langyaw’ng base militar sa China uban ang tinuig nga abang nga $20 milyones sa luna pila lang ka kilometro gikan sa bugtong US military base sa Africa; ug
Ang utangan nga Kenya mahimong motahan sab sa ilang pantalan sa Mombasa ngadto sa China.
* * *
- Latest
