Lisud gyud kaayo pakighinabian si Kamagayan Barangay Kapitan Raquel Avila aron unta siya makatubag sa pasangil nga siya ug ang iyang bana nga konsehal ra usab sa barangay, maoy nagpadagan og illegal swertres sa ilang barangay.
Dili na maihap ang akong mga tawag ug text messages, apan karon dili na motubag. Diha’y higayon nga giingnan ko nga human nila’g sang-at sa ilang certificates of candidacy magpa-interview siya, apan dihang akong gitawgan, dili motubag.
Naninguha gyud ko nga makakuha sa iyang “side” kay ang iyang uyoan nga si Konsehal Celestino “Tony” Avila, mao man gyud ang nagpa-interview nga si Kapitan Avila ug ang iyang bana nga si Konsehal Rene Roy Avila maoy operator sa illegal swertres sa ilang dapit.
Ang operation kuno niini miabot sa ubang mga kanait nga barangay. Akong balikon nga maglisud ko pagtuo nga ang magtiayong opisyal sa Kamagayan nag-operate og ilegal nga kalihukan, mao nga gusto gyud nako sila nga mahinabi.
Mihimo na ko og background check, usa sa akong mga amigo mihulagway nga buotan man kuno kini si Kapitan Avila. Luoy sab kaayo nga motuo ang katawhan nga naghimo siya og illegal kon dili man tinuod.
Busa, hangtud karon, nagpaabot ko nga kahatagan og higayon nimo Kapitan Avila nga ma-interview ka aron ka makahatag sa imong tubag. Ok ba Capt?
Kon anhaon gud ka sa barangay, ang imong mga sakop moingon man nga wala ka, unya kon tawgon, dili ka motubag. Pwerteng lisura gyud. Sayon pa kontakon si Mayor Tomas Osmeña.
* * *
Buyno, padayon ko nga naglibog kon ngano nga hangtud karon, gipasagdan ra sa kapolisan, ilabi na sa mga sakop sa Criminal Investigation and Detection Group (CIDG) ang operation sa mga illegal swertres dinhi.
Usa nako ka higala nga sakop sa CIDG miingon nga ang gimando gyud sa ilang labaw nga ipahunong ang sugal man nga video karera ug moli-moli, apan wala may apil ang illegal swertres nga maoy labing dako.
Unsa kaha ang rason niini? Saludo ko sa CIDG kay base sa akong mga tigpaniid nga naundang gyud ang operation sa video karera ug moli-moli kay gipatawag sa CIDG ang mga kapitan sa barangay ug gihulga nga ikiha kon dili sila motabang nga kini mahunong.
Tingali, kon duna may karera nga nag-operate, tagu-tago. Text sa 0943-0766611 kon may nag-operate nga illegal gambling machines sa inyong lugar kay ipahibalo dayon nato sa CIDG.
Sa makausa pa, awhagon nako ang CIDG, ilabi na si Supt. Royina Garma nga pasugdi na ang operation sa illegal swertres. Daghang opisyal sa mga barangay dinhi ang nalambigit niini.