Pagsubli sa suholan
Nahawan na ang agianan sa bag-ong umento sa suholan sa Sugbo, Bohol, Negros Oriental ug Siquijor karong tuiga.
Kini human niangkon ang kadagkoan sa Regional Tripartite Wages and Productivity Board (RTWPB) sa Central Visayas nga lapas na sa usa ka tuig human sa kataposang umento niadtong Marso 10, 2017.
Dili na makadangop ang mga negosyante sa technicality sa pagpangita og supervening condition ug makahimo na ang RTWPB pagsugod sa konsultasyon sa nagkalainlaing sektor dinhi sa rehiyon kon pila ang labing tukma nga umento sa minimum nga suholan nga P308 hangtud sa P366 matag adlaw.
* * *
Sa dili pa mosumbalik ang mga negosyante nga itlog ra’y ikahatag nga umento sa suholan kay sama sa mga anak sa singot, naigo sab sila sa Tax Reform for Acceleration and Inclusion (TRAIN) Law ni Presidente Rodrigo Duterte ug kay Semana Santa naman sunod semana, angay nila ning pamalandongan:
P146 ngadto sa P167 matag adlaw na ang labaw sa minimum nga suholan sa Metro Manila (P475 ngadto sa P512) kon itandi sa Central Visayas; ug
P247 matag adlaw kon itandi sa Autonomous Region in Muslim Mindanao (P265), ang labing kabus nga rehiyon.
* * *
Mao nga samtang pulos may sukaranan ang mga petisyon sa nagkalainlaing unyon, mas makiangayon nga palambuon ang gilusad nga kampanya pag-awhag sa Kongreso, nga maoy tinubdan sa gahum sa wage boards, pagtakda og uniporme nga minimum nga suholan sa tibuok nasud.
Mas dako ang kahigayonan nga maminaw ang mga senador ug mga kongresista, labi na kay eleksiyon na sunod tuig, kay sa mayoriya sa mga sakop sa wage boards nga tua kapusta sa mga negosyante.
* * *
Kon makumbinser ang Senado ug ang House of Representatives sa pagsubli sa suholan, nga ila gyud untang trabaho apan gitahan ngadto sa wage boards sa niaging 29 na ka tuig, angay sab nga tul-iron ang usa sa labing dakong inhustisya sa atong panahon.
Angay nga tangtangan sa ilang gahum sa pagbotar atol sa deliberasyon sa wage boards ang mga representante sa National Economic and Development Authority (NEDA) ug Department of Trade and Industry (DTI) kay kasagaran adto modapig sa duha ka representante sa management ug busa kanunay gyud nga mapilde ang duha ka representante sa labor.
- Latest
