Kasumpay sa lana sa oregano, isip usa ka natural antibiotics, sa impeksyons sa tiil ug sa kuko. Pagbutang og gamay nga ‘oregano oil’ sa ininit nga tubig, kanang igo nga mahumol ang tiil sulod sa pipila ka minutos. Himoon kini kausa kada adlaw sulod sa usa ka semana. Sa sinus ug ‘respiratory’ impeksyons, dugangi og pipila ka tulo sa ‘oregano oil’ ug hanggapa ang inalisngaw sa init nga tubig, kausa kada adlaw.
Dulaw (turmeric) – sa ayurveda ug inintsik nga medisina, ang hiyas sa dulaw isip ‘natural antibiotics’, gikonsiderar nila kini nga labing gamhanan sa pagbungkag sa mga bakterya nga makadaot, hasta sa pag-ayo sa impeksyons sa samad. Sa napublikar sa Antimicrobial Agents & Chemotherapy niadtong 2009, ang curcumin sa dulaw, positibo ang resulta sa pakigbatok sa ‘helikobakterya’. Magsagol og usa ka tasa nga pinulbos nga dulaw ug 5-6 ka kutsara sa ‘pure honey’. Inighuman og kutaw, hiposa ni sa sudlanan nga may takob. Mokonsumo ka niini og tunga sa kutsarita kaduha kada adlaw. Mahimo nga motumar og turmeric supplement 400-600mg kaduha kada adlaw, pero pangayo’g tambag sa imong doktor.
Luy-a (ginger) – ang katakus sa luy-a isip ‘natural antibiotics’, mao ang pagtabang nga mosanta ug mopaalibyo sa bakteryal impeksyons. Nagbaton sab ni og antibakteryal sa baga ug sa impeksyon sa ngipon. Ang luy-a’ng tsa epektibo’ng panagang batok sa bakteryal impeksyons.
Pagkagod (grate) og usa ka pulgada nga luy-a, unya ilunod sa usa ug tunga sa baso’ng tubig, dayon pabukalan sulod sa 10 minutos. Inighuman, salaon ug dugangan og honey ug duga sa lemon. Mahimo nga iapil kini kanunay sa mga pagkaon ug isagol sa mga imnonon nimo kada adlaw.
* Apple cider vinegar (ACV) – mansanas kini nga gisuka (fermented), nga mas maayo gamiton kadtong lubogon (w/mother), kon maoy tuyo isip natural nga antibiotics. Kon unsa ni kaepektibo, makadaghan na ni natong naapil sa pagtuki.