Usa ka buwan na nga dinakpanay
Mapupos na sunod semana ang usa ka buwan nga pagkatanggong sa mga sakyanan nga gipadakop ni Cebu City Mayor Tommy Osmeña tungod sa pag-counterflow.
Makuha na pagbalik sa unang hugna sa mga motoristang nadakpan ang gikamingawan nilang mga sakyanan.
Hangtud sa niaging semana, kapin sa 400 ka motorsiklo, 30 ka pribadong awto, 10 ka taxi ug walo ka PUJs ang nadakpan sa kampanya nga nagsugod niadtong Pebrero 5.
Ang kapin sa gatus ka sakyanan nga nadakpan sa unang adlaw sa kampanya gitakdang buhian sa CCTO unya sa Martes, Marso 6.
* * *
Samtang libre ang 30 ka adlaw nga pagkatanggong, kay ang bugtong bayranan sa nadakpan nga mga motorista mao ra man ang P500 nga multa sa counterflow, may sukaranan ang kabalaka unsa na ang kahimtang sa buhian nga mga sakyanan.
Kay ang mga sakyanan nga nadakpan sa unang semana sa kampanya gitanggong sa dakong hawan sa SRP nga wa’y atop gikan sa init ug uwan, ni bungbong nga makatabon gikan sa pisik sa dagat nga makamugna og paspas nga taya sa wa pa kakita ang CCTO sa bakanteng bodega sa Bigfoot.
* * *
Nipasidaan si Mayor Osmeña sa mga motorista nga mokuha sa ilang mga sakyanan gikan sa CCTO sunod semana, nga kon dili sila motagam ug madakpan na sab sa ikaduhang higayon sa pag-counterflow, madoble na ang gidugayon sa pagkatanggong sa ilang mga sakyanan: 60 ka adlaw o duha ka buwan.
Dakong kawad-on ang pagkatanggong sa pribadong mga sakyanan, apan mas dako ang kadaot sa pagkatanggong sa mga sakyanang pamasahero. Mga drayber ug operators sa nadakpang taxi ug PUJs nahikawan sa lehitimo unta nilang kita.
* * *
Hangtud sa akong pagsuwat niini, wa pa’y nipasaka og kaso batok sa kontrobersiyal nga Executive Order No. 34 ni Osmeña.
Kini bisan og may abogado na nga nadakpan ug nasakmitan og sakyanan sa kampanya.
Ug kini bisan sa awhag ni kanhi mayor Mike Rama sa iyang kaubanan sa Barug Team Rama sa pagkuwestiyon didto sa korte sa legalidad sa sugo ni Osmeña.
Gisalikway ni Rama atol sa Arangkada sa DYAB Abante Pa, Bisaya! ang sugyot nga motuyo siya og counterflow ug magpadakop aron nga siya ang mangunay sa pagkiha ni Osmeña.
* * *
- Latest