Gustong mobaligya sa iyang bahin
Dear Atty. Divine,
Ang akong igsuon nga lalaki tiguwang na, biyudo ug wa’y anak. Sa buhi pa ang among ginikanan, kaming pito ka anak gihatagan na og luna nga maoy angkon o bahin namo, ug maoy among giugmad.
Ang akong igsuon nga tiguwang na, gustong mobaligya sa iyang share samtang buhi pa siya kay wa man siya’y anak. Apan ang duha namo ka igsuon misupak kay wa pa kuno maklaro og bahin kay ang titulo nakapangalan pa man sa among amahan.
Kaming upat miuyon sa pagbaligya aron magamit sa akong igsuon ang kwarta. Ang akong pangutana kon makabaligya ba mi sa among share bisan kon nakapangalan pa kini sa among amahan ang title? Daghang salamat. — Linda
Dear Linda,
Bisan og wala pa ma-subdivide ang property nga inyong na-inherit gikan sa inyong amahan, duna mo’y katungod sa pagbaligya niini kutob lang sa inyong share.
Ang concern lang sa inyong duha ka igsuon ngano nga misupak sila sa pagbaligya kay wa pa ma-subdivide ang property. Ang maayo ninyong buhaton mao ang pagpa-survey sa property ug inyo kining bahinon in- equal share ninyong pito.
Sabotan ninyo nga kadtong inyong angkon ug giugmad maoy basehan sa pag-subdivide. At least, identified na ang inyong share ug naklaro na ang utlanan, so dili na mo maglisud sa pagbaligya.
Samtang kadtong dili gusto nga mobaligya sa ilang share, ipa-approve nila ang subdivision plan sa Bureau of Lands aron ma-submit sa Register of Deeds ug ma-isyuhan mo og tagsa-tagsa nga titulo human sa inyong pagbayad og Estate Tax sa BIR. Thanks and God bless.-Atty. Divine
- Latest