Nakahigayon ko pagbarug atubangan sa mga sakop sa Cebu City Council kaniadtong Martes, kay ako ang gipadala sa The Freeman/Banat News, nga modala sa tingog sa among kompaniya atol sa pagtuki sa ordinansa nga maghatag og cash assistance sa mga sakop sa media nga maangol ug mamatay atol sa pag-cover nila sa mga anti-crime operations.
Bisan tuod og naa ko madestino sa City Hall sa pag-cover sa inadlaw’ng kalihukan, apan una pa kadto nga higayon nga mibarug ko atubangan sa mga konsehal ug mihatag og pakigpulong. Una, gisuportahan nako ang nindot nga ordinansahon ni Konsehal Jun Gabuya.
Tinuod, dako kaayo og tabang ngadto sa mga sakop sa media ang paghatag sa City Hall og cash assistance panahon nga maangol sila sa pag-cover og mga anti-crime operations sa kapolisan, labaw na gyud og mamatay.
Apan sugyot nako nga dili lang unta i-limit sa anti-crime operations ang paghatag og tabang. Pananglit, kami nga nag-cover sa City Hall ug sa Kapitolyo, nga tungod sa pagsuwat namo og mga balita nga nagbutyag sa anomaliya sa mga opisyal, unya pamusilon mi, nagpasabot ba nga dili kami apil nga makabenepisyo kay dili man anti-crime operations?
Aw hinoon, kinahanglan pa nga lantugian kini pag-ayo sa mga konsehal. Kana kon gusto gyud sila nga motabang sa media. Ang laing isyu nga maglambigit niini kon apil ba sa coverage ang mga blocktimers nga kumentarista sa radyo nga siguradong makabaton og kontra tungod sa ilang kumentaryo.
Masinati kining maong problema kon usbon ni Konsehal Gabuya ang title sa iyang gisugyot nga ordinansa, ug ilisan ang termino nga “anti-crime” aron maapil sa coverage kadtong mga media nga nadestino sa mga local government units.
Wa’y laing representante sa media outlets nga mitunga sa maong public hearing. Gisugyot usab nako nga usbawan ang kantidad nga ilang gitanyag kay ang P5 mil nga cash assistance sa makaangkon og light injuries nga dili sila maka-duty sulod sa 10 ka adlaw, unya P10 mil sa mga makaangkon og serious injuries nga dili na makapadayon sa pagka sakop sa media, ug P15 sa mga mamatay, gamay ra.
Para kanako, kon motabang man gani ang siyudad, kanang dili kataw-anan nga mura’g may pagka dala nga ulog-ulog lang. Dili man gyud maabusohan kining mao nga paghatag og benepisyo, kay kinsa man gud nga reporter nga magpaigo gyud og bala kon mouban og operation.