Manamilit na ang tuig 2017, ug hangpon usab nato ang tuig 2018. Unsa man ang atong nakat-onan sulod niining tuiga, ug unsa man ang atong mga gitinguha nga kab-oton sa umaabot nga tuig?
Kini ang atong hinuktokan isip pagbalik tan-aw sa nangagi, ug paglili usab sa kaugmaon nga nagpaabot kanato. Daghan nga mga suliran ang natagamtaman sa matag usa kanato diin ang uban nahatagan og kasulbaran, samtang ang uban kasamtangan nga gipangitaan og sulbad, ug aduna na usa’y nakalingkawas na.
Kining tanan, mga pagsuway lang nga atong nahiaguman nga kinahanglan natong buntogon sanglit mas gamhanan kita kay sa mga gumonhap nga naghamok kanato.
Sa pagsulod na nato sa laing tuig sa atong kinabuhi, kita gihapon ang master sa atong kaugalingon nga magbuot kon asa kita mopadulong.
Dili na kinahanglang magpatagna kita sa mga fortune teller aron kita swertehon ug dili na kinahanglan nga magpalihi kita aron abunda ang atong kinabuhi.
Ang importante mao ang kakugi ug diskarte aron kita makasugakod ug kon maningkamot makabaton ug haruhay nga kinabuhi.
Ang atong palad wala sa uban mao nga kita ang nagkupot sa atong ugma.
* * *
Samtang pahinumdom lang sa pagsugat sa Bag-ong Tuig nga unta dili magpalabi sa kalipay nga mogamit og mga pabuto nga posible nga maoy makaingon sa disgrasya, ug dili usab magpalabi sa pag-inom og bino aron dili maaksidente.
Kon moinom man, dili na lang mo-drive aron safety. In moderation usab sa mga pagkaon, ilabi na kadtong mga mahilig sa lechon ug humba, aron makaabot pa sa laing tuig sa kinabuhi.
Basin baya kon magpalabi ikaw na manamilit sa kalibutan ug dili ang tuig.