Kini ang batakang prinsipyo sa pagpatuman ug sa pagsunod nato sa mga lagda sa balaod. Nagpasabot kini nga wala’y gipili ang balaod, bisan presidente o yanong tawo, kon makasala silotan.
Wala usa’y gamay o dako nga sala nga angayang palabyon, sanglit aduna kini tukma nga silot tungod kay kini ang gimbut-an sa balaod.
Apan kining prinsipyoha gusto nga gub-on ni House Majority Floor Leader Rodolfo Fariñas kinsa adunay kontrobersiyal nga kamandoan ngadto sa mga opisyal sa Department of Transportation (DOTr) atol sa gipahigayong hearing sa kongreso.
Matud sa magbabalaod nga angayang palabyon ug dili sitahon ang mga kongresista kon makalapas kini sa lagda sa trapiko. Inay silotan, mas maayo kuno nga eskortan kini sa mga enforcer aron dili malangan ang ilang biyahe.
Pastilan, pagkabaga na lang g’yud sa kubal sa nawong niining mao nga magbabalaod. Sila ang nagpanday sa balaod, apan gusto sila nga dili iapil sa silot, ug panggaon na hinoon.
Unsa na man kining matang sa atong mga opisyal sa nasud nga wala na man intawo’y delicadeza. Unsa man ang kalainan nila sa mga yanong tawo? Angayan man gani nga sila ang magpakita sa ehemplo aron mosunod kanila ang mga tawo.
Admitido ako nga dili ko ganahan kaniadto ni kanhi Presidente Aquino, apan usa sa akong nagustohan nga iyang gipatuman, mao ang pagwagtang sa wangwang. Patas niadto ang tanan, ma-opisyal o yano nga katawhan.
Ang gihimo ni Fariñas usa ka pag-abuso sa gahum ug pagpalabilabi nga nagpakita sa iyang pagka arogante. Subo palandungon nga ang naasoy’ng lakang naggikan sa usa ka law maker nga gustong makalusot kon makalapas na sa balaod.