EDITORYAL - Papel sa CHR

Hapit na ang pagtimaan sa deklarasyon sa 1972 Martial Law  karong Septiyembre 21 nga sa tantong pakigbisog nabalik ra gyud intawon ang demokrasya niadtong 1986.

Sa panahon sa Martial Law gitumban ug gipanamastamasan ang tawhanong katungod ang mga walay kadangpang mga yanong katawhan kondili ang pagtingog batok sa rehimeng Marcos ug sa iyang mga alipores ug supporters nga duol sa luwag.

Karon nabutang na usab sa peligro ang demokrasya sa Pilipinas niining tinguha nga ipiton ug wagtangon gyud ang Commission on Human Rights pinaagi sa paglingla sa katawhan nga ang maong ahensya milaban sa mga kriminal ug wala sa mga polis ug kasundalohan.

Subay sa Konstitusyon, dili papel sa CHR ang paglaban sa mga kriminal o sa mga kapolisan. Kondili ang pagsiguro nga giprotektaran sa mga ahente sa gobiyerno ang tawhanong katungod, suspek man o inosente.

Kay mao   kini ang kasabotan nga gipirmahan sa nasud ngadto sa ubang kanasuran. Mao nga tungod sa mga tiyabaw sa mga tagtungod sa mga nangamatay sa “war on drugs”  nipahinumdom ang CHR sa gobiyerno sa obligasyon niini.

Di trabaho sa CHR ang moimbestigar kon adunay inosenteng tawo o polis nga mapatay sa mga kriminal kay trabaho kana sa kapolisan ug ubang law enforcement agencies.  Kataw-anan paminawon kon mamandaran pa sa CHR ang mga kriminal nga tahuron usab nila ang tawhanong katungod sa mga polis ug ilang mga biktima dili ba?

Apan mga law enforcers nga ahente sa gobiyernong nipirma sa kasabotan sa Universal Declaration on Human Rights sa kalibotan, gipaabot nga mosunod sila sa mga lagda ug dili abusohon ang ilang gahom.

Ang CHR pinatuyo gyud nga gibutang diha sa Konstitusyon, ang pinakataas sa tanang balaod nga naa karon sa Pilipinas, tungod ug alang sa kasigurohan nga dili abusohon sa mga ahente sa gobiyerno ang gahom nga gipagamit kanila. Kun wa nay CHR asa man kaha modangop ang yanong Juan dela Cruz kun ang niabusar kanila mao ang mga anaa sa gobiyerno?